O PSOE de Lugo reclama a execución inmediata do aparcadoiro previsto no Ceao
A voceira adxunta do Grupo Municipal Socialista de Lugo, Ana González Abelleira, reclamou ao Goberno local a execución inmediata do aparcadoiro previsto no polígono industrial do Ceao, unha actuación que, segundo indicou, quedou definida e lista para a súa fase de execución durante o anterior mandato municipal.
A representante socialista destacou que a proposta conta co respaldo de asociacións empresariais, empresas e persoas usuarias dunha das principais áreas industriais e comerciais da cidade, un espazo no que, segundo explicou, existe unha crecente necesidade de novas prazas de estacionamento debido ao aumento da actividade económica e ao dinamismo da zona.
Segundo expuxo González Abelleira, a única decisión pendente sería poñer en marcha un proxecto xa rematado a nivel técnico, polo que considera que non existen motivos para continuar atrasando unha infraestrutura que cualificou de prioritaria para o desenvolvemento do Ceao e da economía local.
A actuación prevista contempla a transformación dunha parcela municipal duns 4.500 metros cadrados, ocupada actualmente por unha instalación fotovoltaica en desuso, nun novo aparcadoiro con capacidade para 125 vehículos.
O proxecto distribúe os espazos en dúas áreas principais de estacionamento e unha terceira zona reservada para persoas con mobilidade reducida e puntos de recarga destinados a vehículos eléctricos. O deseño inclúe tamén tres corredores bidireccionais para facilitar a circulación e as manobras, con accesos previstos desde as rúas Agricultura e Industria.
Ademais, a iniciativa incorpora medidas orientadas á sostibilidade, coa creación dun cinto verde e zonas arboradas que rodearán a infraestrutura ao longo da Avenida Benigno Rivera e das rúas Agricultura e Industria.
A edil socialista explicou que, tras analizar distintas alternativas dentro do orzamento dispoñible, fixado en 450.000 euros, se escolleu a opción que permitía aumentar o número de prazas de estacionamento reducindo os custos de mantemento e favorecendo unha mellor integración urbana.
Entre as medidas adoptadas tamén figura a eliminación da antiga pérgola e das estruturas metálicas utilizadas anteriormente para soportar paneis solares, apostando pola utilización de pavimentos filtrantes e un sistema de drenaxe natural mediante un cinto verde destinado á recollida das augas pluviais.
Para González Abelleira, esta intervención supón unha maneira de planificar o futuro da cidade resolvendo necesidades concretas e reforzando a competitividade dos polígonos industriais. Ao mesmo tempo, criticou ao actual Executivo municipal por manter, segundo afirmou, paralizadas actuacións estratéxicas xa preparadas no mandato anterior.
Neste sentido, acusou ao Goberno local de priorizar actuacións de curto percorrido fronte a proxectos estruturais destinados a mellorar a cidade a medio e longo prazo. A representante socialista insistiu en que os recursos municipais deben destinarse a actuacións que melloren a mobilidade, impulsen a actividade económica e dean resposta ás necesidades da veciñanza e do tecido empresarial.