Política

Miguel Fernández acusa ao Goberno local de paralizar unha actuación estratéxica e pide recuperar a planificación do anterior Executivo

O portavoz socialista no Concello de Lugo, Miguel Fernández, esixiu ao Goberno local que recupere de inmediato o proxecto da gran zona pública de baño e lecer no río Miño e abandone a inacción que, segundo denunciou, está a impedir que unha das actuacións máis ambiciosas para a cidade poida facerse realidade.

Fernández asegurou que o actual Executivo municipal “non deu nin un só paso efectivo” para avanzar nun proxecto estratéxico que, segundo indicou, quedara planificado e encamiñado polo anterior Goberno, con contactos xa iniciados coas administracións competentes e unha folla de ruta definida.

O socialista explicou que se trataba dunha actuación que respondía a unha demanda histórica da cidadanía e que buscaba transformar a contorna do Miño nun espazo de referencia para o lecer, o deporte, o turismo sostible e a convivencia cidadá, lembrando ademais a recuperación da contorna da Fábrica da Luz dentro dun plan de turismo sostible con financiamento europeo.

Segundo detallou, o proxecto estruturábase en tres ámbitos: a zona dos Robles, onde se iniciaran contactos coa Deputación para integrar instalacións nunha gran área fluvial de uso público; o parque das Saamasas, cunha intervención respectuosa co medio natural para facilitar o acceso ao río; e a contorna da antiga Fábrica da Luz, un espazo de máis de 10.000 metros cadrados chamado a converterse na primeira gran zona pública de baño da cidade.

Fernández sinalou que esta última actuación era a máis inmediata e que podería estar xa executada, ao considerar que bastaría con acondicionar o espazo, mellorar accesos e realizar tarefas de limpeza e desbroce, pero que, segundo afirmou, quedou paralizada tras o cambio de goberno.

O portavoz socialista lamentou que, coa chegada dun novo verán, non existan avances visibles e que non haxa acordos pechados nin actuacións en marcha, atribuíndoo a un bloqueo político e institucional que, ao seu xuízo, impide dar continuidade a proxectos xa preparados.

Fernández advertiu de que Lugo non pode perder oportunidades para poñer en valor o seu río e defendeu que estes proxectos requiren vontade política, capacidade de xestión e coordinación institucional, asegurando que o actual Goberno recibiu unha planificación completa.

O líder socialista ofreceu colaboración institucional para evitar a paralización definitiva da iniciativa e mesmo se comprometeu a facilitar interlocución coas administracións implicadas se fose necesario, co obxectivo de desbloquear o proxecto.

Concluíu afirmando que Lugo debe aproveitar o potencial do Miño e avanzar cara a unha nova relación co seu río, reclamando pasar das escusas á execución de actuacións que, segundo indicou, xa estaban preparadas.