O saxofonista lucense Xurxo Morales, recoñecido a nivel internacional
![xurxo morales saxofon andorra](https://lugoxa.com/wp-content/uploads/2021/04/xurxo-morales-saxofon-andorra.jpg)
O lucense Xurxo Morales Varela, de 17 anos, vén de acadar o terceiro premio na sección de novos talentos nas xornadas internacionais de saxofón 'Andorra Sax Fest'21'. Xurxo Morales participou nesta sección do certame como único representante de España e competiu con outras nacionalidades como Francia, Rusia e Italia.
Formado no Conservatorio e en centros de ensino musicais de Lugo, Xurxo Morales estivo á altura de saxofonistas formados en Versalles e Moscú, dos que procedían os outros premiados. O terceiro premio acadado, supuxo un estimulante recoñecemento, ao tratarse da súa primeira participación, resultando ser o único participante de España premiado en calquera das categorías.
Como concursante na sección de ata 17 anos de idade, clasificouse a continuación de Chiara Beatrice Cannavale (Italia, 1° Premio) e Dmitry Pinchuk (Rusia, 2° Premio).
Consciente de que isto só supón un bo comezo, agradece a formación inicial que, de xeito lúdico e dende moi pequeno, lle achegou o seu pai, tamén músico.
Unha das sensacións máis gratificantes da recepción do premio, asegura, foi poder contestar ás preguntas dos profesores do xurado sobre o seu centro de procedencia. Así, puido nomear con orgullo o Xoán Montes de Lugo e situalo xunto aos centros de Versalles e Moscú, dos que procedían os outros premiados. Xurxo Morales di sentirse en débeda coa dirección do Conservatorio de Lugo, de onde saen excelentes músicos lugueses aos que toma por referentes.