O sector do metal volverá ás rúas de Lugo por un convenio sen acordo
Os traballadores do metal e do comercio do metal sairán de novo ás rúas de Lugo este mércores para reclamar avances na negociación dos seus convenios colectivos. A manifestación comezará ás 12:30 horas en Garabolos e rematará diante da sede da Confederación de Empresarios de Lugo (CEL), situada na praza de Santo Domingo.
O percorrido continuará pola avenida da Coruña e polas rúas de San Fernando e San Marcos. A protesta dá continuidade á mobilización celebrada o pasado 14 de outubro no polígono industrial do Ceao e será o principal acto da segunda xornada de folga convocada na provincia polos sindicatos CIG, CCOO e UXT.
As centrais sindicais advirten de que, se a negociación non permite pechar un acordo, promoverán outras tres xornadas de paro os días 28 de outubro e 3 e 5 de novembro.
O desacordo entre a representación sindical e a patronal céntrase nas condicións laborais e salariais dos convenios do siderometal e do comercio do metal. Os sindicatos consideran insuficiente a última proposta empresarial, que contempla unha subida salarial do 2 % e unha diminución de catro horas da xornada anual, pero unicamente para o convenio do siderometal.
A CIG critica que a redución horaria non se estenda tamén aos empregados do comercio do metal. A organización defende que non debe haber diferenzas nas condicións laborais entre ambos os sectores, cuxos convenios se están negociando de forma paralela na provincia.