O selo STEP avala a innovación da planta de fibras téxtiles de Altri e a súa capacidade para transformar a industria europea
A planta de fibras téxtiles de base celulósica que Altri proxecta en Palas de Rei deu un paso decisivo no seu desenvolvemento. A Axencia Executiva Europea de Clima, Infraestruturas e Medio Ambiente (CINEA) outorgou ao proxecto GAMA o selo STEP, unha distinción que confirma o seu carácter estratéxico para reforzar a competitividade industrial da Unión Europea e acelerar a transición verde.
O recoñecemento sitúa a futura fábrica como prioritaria para acceder a instrumentos financeiros e programas comunitarios, reservados a iniciativas capaces de impulsar a autonomía industrial, a innovación e a descarbonización en Europa.
A Comisión Europea valorou positivamente todos os aspectos analizados do proxecto GAMA, destacando especialmente o grao de innovación, cualificado como notable; a redución de emisións de gases de efecto invernadoiro (GEI), con sobresaínte, polo seu forte potencial de evitación de emisións; e o grao de madurez e eficiencia de custos cun notable, grazas a unha planificación técnica sólida e unha estratexia económica viable.
A análise subliña que a innovación proposta por GAMA é “sólida, crible e ben fundamentada”. A documentación técnica presentou un escenario de referencia e un escenario proxectado con factores de emisión considerados rigorosos, trazables e tecnicamente coherentes.
O informe europeo tamén resalta que a produción de fibra Lyocell, un material biodegradable e de baixo impacto ambiental, permitirá substituír un 77,5% de fibras sintéticas e un 22,5% de algodón, contribuíndo a reducir a dependencia de materiais altamente contaminantes ou intensivos en recursos naturais. En definitiva, a avaliación confirma que GAMA cumpre os estándares de excelencia da Comisión Europea e contribúe de forma significativa aos obxectivos climáticos, industriais e tecnolóxicos da UE.
Para José Pina, CEO de Altri, a obtención do selo STEP “refrenda o que sempre defendemos: GAMA é un proxecto serio, rigoroso, sustentable e innovador, deseñado para responder á necesidade do sector téxtil de contar con fibras respectuosas co medio ambiente e totalmente biodegradables, en liña cos requirimentos da Unión Europea”.
O proxecto en cifras
O complexo industrial previsto por Altri suporá máis de 1.000 millóns de euros de investimento e aspira a converterse nunha referencia europea en produción de fibras sustentables.
Toda a produción procederá de madeira de eucalipto certificada, garantindo fibras 100% biodegradables e reciclables.
A fábrica necesita un cadro de persoal de 500 traballadores en distintos quendas, xa que estará en funcionamento as 24 horas, e, a isto, hai que sumar máis de 2.000 empregos indirectos.
Que é o selo STEP?
O selo STEP (Strategic Technologies for Europe Platform) é unha etiqueta de calidade concedida pola Comisión Europea que identifica proxectos estratéxicos para a competitividade, a transición verde e a transformación dixital do continente, é dicir, recoñece os proxectos industriais que contribúen aos obxectivos estratéxicos da UE en materia industrial, tecnolóxica e medioambiental.
Así mesmo, facilítalles o acceso ás oportunidades de financiamento da UE e a atraer investimentos privados e públicos adicionais ou alternativos.
O carácter moi competitivo das convocatorias STEP e a rigorosa avaliación por parte da Comisión Europea e dos paneis de expertos independentes garanten que todos os proxectos por enriba dos limiares respectivos das convocatorias sexan de alta calidade.
STEP diríxese aos sectores das tecnoloxías dixitais e innovación tecnolóxica profunda (deep tech), as tecnoloxías limpas e eficientes no uso de recursos e as biotecnoloxías.
O proxecto GAMA enmárcase no segundo epígrafe, ao impulsar a produción industrial sustentable e a substitución de materias primas contaminantes no sector téxtil.