O VIII Friulio consolídase como unha das grandes citas de recreación histórica de Galicia
O VIII Friulio pechou esta fin de semana unha nova edición marcada pola alta participación, a implicación veciñal e o ambiente festivo que converteu de novo a Friol nun referente da recreación castrexo-romana en Galicia.
O evento, impulsado pola asociación A Castronela, volveu reunir a centos de participantes e visitantes arredor dun programa no que non faltaron os campamentos castrexos e romanos, os postos de artesanía, os espectáculos, a música e as actividades culturais e divulgativas.
Os organizadores e colaboradores destacaron especialmente o crecemento que experimentou o Friulio nos últimos anos, pasando de ser “o soño dun grupo de amigos” a converterse nun proxecto colectivo no que participa toda unha comunidade. A implicación de veciños de todas as idades foi, unha vez máis, unha das imaxes máis representativas da celebración.
O entorno natural no que se desenvolve a festa foi outro dos aspectos máis valorados polos asistentes, que destacaron a localización do castro e o coidado na organización dunha cita que cada ano suma máis público e consolida a súa identidade propia.
A climatoloxía, marcada pola inestabilidade durante a fin de semana, non impediu o desenvolvemento das actividades nin restou afluencia a unha edición que os participantes cualificaron de “éxito”. O ambiente festivo mantívose durante toda a programación grazas á colaboración de asociacións, voluntarios, entidades locais e do propio Concello.
Desde distintos colectivos sociais e culturais puxeron en valor tamén a importancia deste tipo de iniciativas para dinamizar a vida social e económica da vila, defendendo o papel das festas e actividades culturais como elemento de convivencia, promoción turística e impulso para o rural.
Durante a xornada tamén houbo palabras de agradecemento para o colectivo O Parladoiro de Friol polo seu labor de difusión e apoio ás actividades culturais e sociais do municipio.
Co peche desta oitava edición, o Friulio reafirma o seu crecemento e a súa consolidación como unha das grandes festas de recreación histórica de Galicia, coa vista posta xa na próxima edición.