Deportes

A Asociación Cultural Xaquedrum e o Concello de Lugo organizan unha actividade gratuíta e aberta a toda a cidadanía, con taboleiros xigantes, partidas convencionais e persoal monitor

A Praza Maior de Lugo converterase durante o mes de setembro nun espazo para achegar o xadrez á cidadanía coa iniciativa "O xadrez xigante regresa ao colexio", organizada pola Asociación Cultural Xaquedrum en colaboración coa Concellería de Cultura e Educación do Concello de Lugo.

A actividade desenvolverase desde o martes, 1 de setembro, ata o mércores, 30 de setembro, de luns a venres, entre as 18:00 e as 20:00 horas. A proposta está integrada no programa "Xadrez para escolares" e busca combinar a práctica deportiva e o lecer nos espazos públicos coa creación dunha alternativa que tamén facilite a conciliación familiar.

Durante as xornadas instalaranse taboleiros de grandes dimensións na Praza Maior, aínda que tamén será posible xogar ao xadrez convencional. As persoas participantes estarán acompañadas por persoal monitor, que ofrecerá orientación e nocións básicas a quen queira achegarse por primeira vez a esta disciplina.

Non será necesario realizar inscrición previa e a participación será totalmente gratuíta. A actividade está dirixida a toda a cidadanía, polo que poderán participar tanto nenos e mozos como persoas adultas con independencia do seu nivel.

O programa "Xadrez para escolares" ten entre os seus principais obxectivos estender o coñecemento desta disciplina en Lugo, con especial atención á poboación máis nova. A iniciativa pretende aproveitar o carácter lúdico do xadrez para introducir tamén aprendizaxes que poden resultar útiles no ámbito educativo e na vida cotiá.

Segundo explica o persoal especializado que participa na actividade, o xadrez axuda a "deterse, analizar distintas posibilidades e asumir as consecuencias de cada decisión", capacidades que poden aplicarse tanto dentro como fóra das aulas.

A práctica desta disciplina contribúe ademais a desenvolver o pensamento autónomo, a capacidade para afrontar problemas e o razoamento lóxico e creativo. Ao mesmo tempo, permite adquirir diferentes habilidades e reforza valores como a responsabilidade, o respecto polas demais persoas e a capacidade para tomar decisións.