Os Cinco Ríos do Corgo organiza un mercadiño 'Especial Día da Nai' o 4 de maio
A asociación Os Cinco Ríos do Corgo organiza un novo mercadiño 'Especial Día da Nai' o vindeiro domingo, 4 de maio, xunto á Cámara Agraria, cunha xornada festiva pensada para gozar en familia e homenaxear a todas as nais.
O evento contará cunha sesión vermú a partir das 12:30 horas e continuará pola tarde cun tardeo amenizado polo Dúo Belinda desde as 16:30 horas, ofrecendo música en directo para acompañar a celebración.
Como detalle especial, todas as nais que se acheguen ao mercado recibirán unha planta de agasallo, a partir das 12:30 horas. Ademais, organizarase un sorteo entre os artesáns e os demais postos participantes, sumando así máis emoción á xornada.
O mercado tamén contará coa presenza de polbeiras, que permitirán aos asistentes desfrutar dunha comida tradicional nun ambiente festivo e de encontro.
Desde a organización animan a veciñanza e visitantes a achegarse e celebrar unha data tan especial apoiando ao comercio local e desfrutando dunha xornada única.