Os Lóstregos Lucus impulsan o VIII Desafío Lostrego pola Ribeira Sacra en apoio á candidatura da UNESCO
O Motoclub Los Lóstregos Lucus organizará o vindeiro sábado 13 de xuño a oitava edición do Desafío Lostrego, pola Ribeira Sacra, unha cita mototurística coa que o colectivo quere amosar o seu respaldo á candidatura da Ribeira Sacra como Patrimonio Mundial da UNESCO.
A proposta desenvolverase nun momento especialmente relevante para a provincia, xa que coincide coas datas nas que o Comité do Patrimonio Mundial deberá decidir sobre a inscrición definitiva da candidatura Ribeira Sacra. Paisaxe da auga na prestixiosa lista internacional. Desde a entidade promotora explican que o obxectivo é sumar apoio social e dar maior visibilidade a este recoñecemento mundial.
A ruta contará cun percorrido de navegación mediante rutómetro e terá unha distancia total de 380 quilómetros. Ademais, estará aberta a todo tipo de motos e ofrecerá dúas modalidades para os participantes: unha opción mixta e outra íntegramente por estrada.
Segundo avanzan desde a organización, o itinerario permitirá percorrer algúns dos enclaves máis emblemáticos e singulares da Ribeira Sacra, poñendo en valor a riqueza paisaxística e cultural dun territorio que sustenta a súa candidatura ante a UNESCO no vínculo entre natureza, patrimonio e auga.
A inscrición incluirá almorzo, comida e cea de fin de festa en restaurante, así como dorsal, camiseta conmemorativa, adhesivos e rutómetro. Tamén haberá premios e sorteos entre os asistentes. O prezo establecido para participar será de 70 euros.
Debido á loxística necesaria e ao respecto polo contorno natural que caracteriza as actividades impulsadas polo club, as prazas serán limitadas. O prazo oficial de inscrición abrirase o 1 de maio.
Con esta iniciativa, Los Lóstregos Lucus reafirma o seu compromiso coa promoción turística de Galicia e coa defensa dun dos seus espazos máis representativos, unindo motociclismo, patrimonio e apoio a unha candidatura que aspira á máxima distinción cultural internacional.