Os sindicatos do ensino concertado cifran en máis do 60 % o seguimento da folga e anuncian novas mobilizacións
Os sindicatos do ensino concertado galego cifraron en máis do 60 % o seguimento da primeira xornada de folga parcial convocada no sector, celebrada esta mañá con paros entre as 9.00 e as 12.00 horas. As seis organizacións convocantes —CCOO, FSIE, UGT, FeUSO, SNEP e CIG— consideran que a participación evidencia o «profundo malestar» existente entre os preto de 7.000 profesionais do ensino concertado ante o bloqueo da negociación por parte da Xunta e da Consellería de Educación.
A xornada de mobilización estivo acompañada de concentracións nas delegacións territoriais e diante do edificio central da Consellería de Educación, nas que participaron milleiros de traballadoras e traballadores para reclamar melloras salariais e da xornada lectiva, así como o cumprimento dos acordos pendentes. Entre as principais demandas figuran a recuperación da paga extraordinaria de antigüidade (PEA), que os sindicatos denuncian que leva 17 anos sen aboarse, a aplicación da xubilación parcial sen restricións, o mantemento do emprego e melloras nas condicións do persoal de administración e servizos (PAS).
As organizacións sindicais salientaron especialmente a participación na folga malia os servizos mínimos decretados pola Consellería, que inclúen un membro do equipo directivo, un integrante do PAS e o 20 % do persoal docente e complementario. Desde a representación sindical consideran que estas medidas foron impostas sen negociación e cualifícanas de «abusivas, desproporcionadas e inxustificadas». Ao seu xuízo, ademais, supoñen un agravio comparativo respecto dos servizos mínimos establecidos noutras mobilizacións do ensino público.
A mobilización trasladouse tamén ás rúas das principais cidades galegas. Os sindicatos destacaron especialmente a concentración de Vigo, que cualificaron de «multitudinaria» e como unha mostra da capacidade de organización e mobilización dos profesionais do ensino concertado.
Entre as reivindicacións do sector atópase o acordo para a equiparación salarial correspondente a 2008 e a redución da xornada lectiva, ademais do pagamento da paga extraordinaria de antigüidade e de diversos complementos vinculados a cargos, dinamización lingüística, coordinacións e titorías. Tamén reclaman un novo acordo de xubilación parcial que non deixe fóra o persoal que ten parte da súa xornada en pagamento privado e un novo acordo de mantemento do emprego, ao considerar que o actual acordo de recolocación non garante todos os postos de traballo.
O persoal do PAS reclama, pola súa banda, a creación dun complemento salarial autonómico que permita dignificar as súas retribucións.
O responsable do ensino privado da CIG, Henrique García, pediu ao conselleiro de Educación, Román Rodríguez, que «actúe con responsabilidade» e deixe de converter a Consellería nunha «fábrica de conflitos». García reclamou un cambio nas políticas educativas e a apertura dunha negociación real na Mesa Tripartita do ensino concertado, que, segundo denunciou, ten actualmente un carácter meramente informativo.
O sindicalista tamén instou a Consellería a apostar pola «calidade do ensino en xeral» en Galiza, sen antepoñer criterios economicistas, e dirixiu outro chamamento ao presidente da Xunta, Alfonso Rueda, ao que responsabilizou da situación de precariedade laboral e salarial e da crecente conflitividade nos servizos públicos.
As organizacións convocantes tamén pediron ás patronais do ensino concertado que teñan en conta as reivindicacións do persoal, especialmente nun momento no que se está negociando o convenio estatal do sector en Madrid.
Os sindicatos advirten de que a mobilización continuará se a Xunta non abre unha vía de diálogo e negociación. «Isto é só o comezo», sinalan, ao tempo que reclaman respecto, cumprimento dos acordos e unhas condicións laborais e salariais dignas para os profesionais do ensino concertado.
O sector representa preto do 30 % do alumnado galego e as organizacións sindicais consideran que as condicións laborais do seu persoal deben ser equiparables ás do resto do sistema educativo. «Non aceptamos ser profesionais de segunda», reivindican.
CCOO, FSIE, UGT, FeUSO, SNEP e CIG aseguran que manterán a unidade sindical e anuncian novas accións reivindicativas nas próximas semanas se a Consellería non modifica a súa posición. O obxectivo, segundo trasladaron, é forzar a apertura da negociación na Mesa Tripartita e avanzar na mellora das condicións salariais e laborais do ensino concertado galego.