Pablo Espiño é o novo presidente de Novas Xeracións do PP de Outeiro de Rei
Pablo Espiño foi proclamado presidente da agrupación local de Novas Xeracións do Partido Popular de Outeiro de Rei, nun congreso celebrado este venres no que recibiu o apoio maioritario dos afiliados da organización xuvenil.
No acto participaron a presidenta provincial do PP, Elena Candia, o alcalde do municipio, José Pardo Lombao, a presidenta de Novas Xeracións de Galicia, Nicole Grueira, o presidente provincial da organización, Miguel Gallego, así como outros representantes do partido a nivel local, comarcal e provincial.
Pablo Espiño deu a coñecer tamén o comité executivo que o acompañará á fronte de Novas Xeracións de Outeiro de Rei, integrado por mozos e mozas de entre 20 e 30 anos: Pablo López (secretario xeral), Óscar Mouriz (vicesecretario de Medio Rural), Pablo Rodríguez (vicesecretario de Deportes), José López (vicesecretario de Tejido Asociativo), Alejandra Villaverde (vicesecretaria de Xuventude), Alejandro Fariñas (vicesecretaria de Familia e Conciliación), Hermi Díaz (vogal) e Tania Díaz (vogal).
O recentemente elixido presidente, veciño de Guillar e estudante de 23 anos, subliñou que Outeiro de Rei “ten moito futuro”, ao tratarse dun concello cunha elevada presenza de xente nova que escolle este territorio para construír o seu proxecto vital. Espiño presentou un equipo que definiu como “comprometido, preparado e convencido de que o municipio avanza na boa dirección, disposto a seguir traballando polo seu futuro”.
O alcalde, José Pardo Lombao, coincidiu nesa visión optimista e salientou que Outeiro de Rei “é un concello con moito futuro porque conta cunha gran cantidade de xente nova”. Atribuíu este crecemento ao traballo continuado e a políticas que apostaron pola planificación a longo prazo, permitindo “situar o municipio á vangarda” e ofrecer cada vez máis servizos que melloren o día a día da veciñanza. Animou tamén á mocidade a implicarse, asumir responsabilidades progresivamente e traballar polo ben común, insistindo en que “a clave é traballo, traballo e máis traballo”.
A presidenta provincial do PP, Elena Candia, destacou que Outeiro de Rei leva anos sendo un referente en ámbitos como a conciliación, o emprego ou o desenvolvemento de solo industrial. Subliñou que o municipio “ten un gran presente, pasado e futuro cun goberno do Partido Popular”, pero insistiu na importancia de incorporar xente nova ao proxecto para fortalecer o traballo non só a nivel local, senón tamén provincial e estatal. Agradeceu a implicación de Espiño e do seu equipo, lembrando que a política é “a mellor forma de traballar polos territorios que representamos”, especialmente nun momento no que “a imaxe dos políticos non pasa polo seu mellor momento”. Animou, ademais, a apoiar ao presidente nacional, que “gañou as eleccións e quedou a un puñado de votos de obter a responsabilidade de gobernar”.
A presidenta de Novas Xeracións do PPdeG, Nicole Grueira, reivindicou que NNXX “é hoxe a organización xuvenil máis forte de Galicia” e que continúa medrando cada día. Atribuíu este avance a un proxecto “sólido, aberto e ambicioso” que promove o talento novo e ofrece espazos reais de participación, decisión e liderado. Incidiu en que “o papel da mocidade na política é fundamental”, e asegurou que este congreso evidencia de novo a confianza dos mozos e mozas no Partido Popular de Galicia.
Pola súa banda, o presidente provincial de Novas Xeracións, Miguel Gallego, puxo en valor o crecemento da organización na provincia e recoñeceu especialmente “a implicación de Pablo Espiño e o seu equipo no noso proxecto”. Ademais, anunciou que seguirán renovando agrupacións locais e desenvolvendo novas actividades.