Pablo Iglesias fai historia no hóckey liña galego coa medalla mundial de bronce
O xogador lucense Pablo Iglesias Carballeira foi recibido polo concelleiro de Deportes, Damián Carballo, no Salón de Plenos da Casa do Concello de Lugo para recoñecer a súa traxectoria no hóckey liña e felicitalo pola medalla de bronce lograda coa selección española júnior nos World Skate Games 2026, celebrados en Asunción, Paraguai.
Con só 18 anos, Iglesias formou parte do equipo que acadou o terceiro posto mundial, un resultado histórico para o deporte galego. Con esta medalla, converteuse no primeiro xogador galego masculino en participar nunha competición internacional de hóckey liña e conseguir un metal.
Durante a recepción, Carballo destacou o esforzo, a perseveranza e a progresión do mozo, cuxa formación deportiva estivo estreitamente ligada ao Club Patín Lóstregos Lucus de Lugo, onde desenvolveu boa parte da súa carreira.
O palmarés de Iglesias inclúe varios resultados destacados nas competicións estatais. Na tempada 2020-2021 foi o máximo puntuador e goleador absoluto de España na Liga Élite Alevín. Dous anos despois, na campaña 2022-2023, volveu liderar a clasificación nacional por puntos na Liga Ouro Infantil. Tamén rematou como máximo anotador do torneo estatal de seleccións autonómicas.
Na categoría xuvenil, durante a tempada 2024-2025, contribuíu a que o CP Lóstregos acadase a cuarta posición na Liga Élite Xuvenil. A nivel individual, finalizou terceiro no ranking de puntos da competición estatal e no Campionato de España da categoría. Nese mesmo período, encabezou a clasificación nacional da Mapax Challenger League e levou o equipo Lucus Augusti ao primeiro posto estatal.
A súa progresión continuou en xuño de 2026 coa medalla de prata no Campionato de España Júnior Masculino, disputado en Oropesa del Mar, que lle permitiu proclamarse subcampión de España da categoría.
O xogador tamén deu o salto á Liga Ouro Masculina e á Liga Élite Sénior, a máxima categoría absoluta do hóckey liña español. Ante a falta dunha competición sénior masculina de ámbito estatal en Galicia, comezou a competir co Tres Cantos, club madrileño.
A recepción institucional serviu para trasladarlle o recoñecemento municipal pola súa dedicación e os resultados acadados, así como para desexarlle sorte nos próximos desafíos deportivos.