Pacios acollerá un obradoiro sobre solo pélvico o martes
A antiga escola de Pacios, no lugar do Covelo, no concello de Castro de Rei, acollerá o martes, 22 de setembro, un obradoiro dedicado ao coñecemento e coidado do solo pélvico. A actividade desenvolverase entre as 16.30 e as 18.30 horas e está dirixida á cidadanía interesada en ampliar os seus coñecementos sobre esta parte fundamental da saúde.
O programa inclúe contidos relacionados coa anatomía do solo pélvico, as súas funcións, diferentes técnicas de tratamento e unha sesión práctica destinada a ofrecer ferramentas útiles para o seu coidado.
O obradoiro será impartido por Cristina Ouro Núñez, matrona do Complexo Hospitalario Universitario de Lugo, no marco da Escola Galega de Saúde para Cidadáns.
As inscricións permanecerán abertas ata o 20 de setembro e poderán formalizarse a través da páxina web da Escola Galega de Saúde para Cidadáns, mediante correo electrónico ou por teléfono.
A iniciativa conta coa colaboración de diferentes entidades e institucións, entre elas os concellos de Begonte, Castro de Rei, Friol, Outeiro de Rei e Rábade, ademais da Consellería de Sanidade da Xunta de Galicia, e busca promover hábitos saudables e contribuír á prevención e mellora da saúde da poboación.