Palas de Rei acolle un obradoiro sobre ciberseguridade que combina cinema e formación práctica
A Casa da Cultura de Palas de Rei acollerá o 9 de xuño, entre as 11:55 e as 15:00 horas, o obradoiro Pantallas abertas: ciberseguridade sen filtros, unha proposta formativa que busca achegar ferramentas para comprender mellor os retos do mundo dixital actual.
A actividade combinará o visionado dun documental cunha sesión posterior de análise e formación, na que se abordarán cuestións clave como a privacidade en internet, a desinformación, a seguridade en liña e o uso responsable da tecnoloxía. O obxectivo é ofrecer unha aproximación práctica e accesible a problemáticas cada vez máis presentes no día a día.
Desde a organización explican que se trata dunha iniciativa pensada para axudar á cidadanía a navegar pola contorna dixital con maior criterio, conciencia e seguridade, promovendo un uso máis informado das ferramentas tecnolóxicas.