Palas de Rei acollerá a segunda edición do Benestar Fest con dous días dedicados á saúde e á creatividade
Palas de Rei prepara a segunda edición do Benestar Fest, unha cita centrada no desenvolvemento persoal e colectivo que regresará os días 26 e 27 de setembro baixo o lema "Sendeiros de creación". O programa combinará propostas relacionadas coa saúde, a creatividade e o equilibrio entre corpo e mente, con actividades dirixidas a diferentes públicos.
O festival busca ofrecer alternativas para explorar distintas formas de expresión e benestar a través de experiencias que favorezan tanto a conexión persoal como a colectiva. A programación reunirá especialistas de diferentes ámbitos e incluirá propostas relacionadas co movemento, as artes, a alimentación, a música e o desenvolvemento persoal.
Entre as actividades previstas figuran propostas de movemento e somática, sesións de arteterapia e iniciativas arredor da cociña saudable, o benestar e a sustentabilidade. Tamén se organizarán conversas sobre saúde e benestar e presentarase o ensaio "Conexiones", de Sandra Goded.
O programa completarase con obradoiros e concertos de música contemplativa, un taller de Chi Kung, unha carpa interactiva de títeres e actividades infantís, ademais dunha sesión de danza contemporánea adaptada ás necesidades especiais e unha feira de artesanía.
A segunda edición do Benestar Fest foi presentada por Milagros Bordones, profesora de ioga e pilates das clases de Movimiento Bienestar na Casa da Cultura de Palas, e Judith Rodríguez, responsable da proposta de teatro con títeres. No acto tamén participou o alcalde de Palas de Rei, Pablo Taboada, en representación dunha das administracións colaboradoras coa iniciativa.
As persoas interesadas en participar poden realizar a inscrición a través do teléfono 628 139 113.