Palas de Rei celebrará o Entroido do 15 ao 17 de febreiro con actividades infantís e concurso de disfraces
O Concello de Palas de Rei celebrará o Entroido 2026 cun programa de actividades que se desenvolverá ao longo de tres días, os domingos 15, luns 16 e martes 17 de febreiro, e que estará dirixido a públicos de todas as idades. A programación combinará propostas para a cativada con actos pensados para a participación do conxunto da veciñanza.
Entre as actividades previstas destaca a celebración do entroido infantil, concibido para que os máis pequenos poidan gozar destas datas cunha programación específica, así como o tradicional concurso de disfraces e comparsas, aberto a todos os públicos.
Unha das principais novidades desta edición é o incremento da partida económica destinada aos premios do concurso, que ascenderá a un total de 3.000 euros. Esta contía repartirase entre as distintas categorías co obxectivo de fomentar a participación e o carácter creativo do Entroido en Palas de Rei.
Desde o Concello salientan que a proposta busca consolidar o Entroido como unha das citas festivas máis destacadas do calendario local, promovendo a convivencia, a tradición e a participación veciñal.