Palas de Rei levará o xadrez á rúa co segundo torneo O Teu Xacobeo
A Praza do Concello de Palas de Rei converterase o sábado 31 de outubro nun espazo dedicado ao xadrez coa celebración do II Torneo O Teu Xacobeo, organizado pola Escola Luguesa de Xadrez. A competición comezará ás 16.00 horas e ofrecerá unha tarde de partidas, convivencia e promoción deste deporte entre a veciñanza e as persoas visitantes.
O torneo enmárcase no proxecto 'Xadrez no Camiño – O Teu Xacobeo', unha iniciativa que busca achegar o xadrez e a cultura ás localidades polas que transcorre o Camiño de Santiago. Nesta segunda edición en Palas de Rei, os taboleiros ocuparán un lugar destacado na praza para sacar este deporte dos espazos habituais e achegalo ao público.
A competición desenvolverase ao longo de sete roldas, con partidas programadas cada media hora entre as 16.00 e as 19.00 horas. As persoas inscritas deberán confirmar a súa participación ás 15.45 horas, antes do comezo da primeira partida. A cota de inscrición será de 10 euros.
En canto aos premios, o torneo repartirá 100 euros para o primeiro clasificado, 60 euros para o segundo e 30 euros para o terceiro. Ademais, haberá un premio de 20 euros para o mellor xogador local de Palas de Rei.
A xornada rematará coa clausura prevista para as 19.15 horas, na que se entregarán os trofeos e se ofrecerán petiscos de empanada e pizza. Este encontro permitirá aos participantes compartir as súas impresións sobre as partidas e poñer o broche final á competición nun ambiente distendido.
A iniciativa conta co financiamento da Xunta de Galicia e de Xacobeo 27, así como coa colaboración da Deputación de Lugo, o Concello de Lugo, El Progreso e o Concello de Palas de Rei, xunto coa Escola Luguesa de Xadrez, responsable da organización.