Patricia Otero di que Alcoa non pode darlle as costas aos centos de traballadores
A secretaria provincial de Lugo e deputada autonómica, Patricia Otero dixo hoxe que Alcoa “non pode dar as costas a centos de traballadores, ás súas familias e a unha comarca enteira que durante máis de dúas décadas obtivo, ano tras ano, importantes beneficios e inxentes recursos públicos”.
A dirixente socialista remarca que “nestes intres a empresa Alcoa ten sobre a mesa unha proposta para acadar un posible acordo, e o Goberno de España que como xa demostrou, está comprometido con esta solución”.
Otero sinala que neste escenario “a obrigación de Alcoa é escoitar a voz dos traballadores, das administracións, tanto a central como a autonómica, a dos Concellos, e por suposto a de toda a Mariña enteira para lograr a venda da factoría de San Cibrao a Liberty. Non hai coartada para Alcoa. Acabáronse as escusas”, insistiu.
Nesa liña remcara que “este é o momento da responsabilidade para Alcoa. Esixímoslle que este á altura do momento e materialice dunha vez por todas a venda da factoría. Non pode traizoar a confianza e a xenerosidade que lle deu a nosa terra”, advertiu.
A Deputada Autonómica afirma que “o Goberno Central está deixandose a pel para facer posible a venda, e dar paso a un proxecto industrial pioneiro que garanta o futuro da factoría e de todos os postos de traballo na Mariña. A solución imponse, porque Alcoa carece xa de escusas. A venda é a solución”.
Desviar a atención non favorece aos intereses dos traballadores
E inisitiu na súa argumentación “non hai outro camiño e calquera intento político, por parte de calquera partido, de desviar a atención, sería unha irresponsabilidade que non favorece aos intereses dos traballadores e da nosa comarca. Hai quen se empeñou , durante meses, en facer desta crise unha arma política contra o Goberno Central. Pero como podemos constatar agora, quedaron en evidencia”, replicou.
Otero explica que “o Executivo Central sempre estivo ao carón dos traballadores, de xeito discreto, sumando forzas cos sindicatos, e traballou a reo con tódolos seus recursos, para acadar unha solución na fabrica de San Cibrao”.
O domingo en Xove
Por último dixo “os socialistas apostamos desde o primeiro momento pola venda como solución, apoiámola e confiamos en que finalmente se abra paso. E por suposto este domingo estaremos en Xove, apoiando aos traballadores”.