Paula Núñez impartirá na UNED de Lugo un curso para impulsar o liderado persoal e aprender a tomar decisións

A UNED de Lugo celebrará os días 26 de novembro e 3 de decembro o curso "L.I.D.E.R.A.: claridade para decidir, estratexia para avanzar", unha proposta formativa destinada a reforzar o autocoñecemento, mellorar a toma de decisións e adquirir ferramentas para afrontar novos retos persoais e profesionais.
A actividade estará impartida por Paula Núñez, coach profesional certificada pola Asociación Española de Coaching (ASESCO) e especialista en liderado persoal, desenvolvemento profesional e acompañamento en procesos de cambio. O obxectivo é axudar ás persoas participantes a identificar as súas capacidades, motivacións e prioridades, transformar as inquietudes en obxectivos realistas e avanzar con maior confianza en situacións de cambio ou incerteza.
O programa dividirase en dúas sesións complementarias. A primeira, o 26 de novembro e baixo o título "Comprender", centrarase na análise da situación persoal, na identificación das fortalezas propias e na definición do rumbo que se desexa seguir. A segunda, prevista para o 3 de decembro e denominada "Construír e actuar", abordará a planificación estratéxica, os recursos necesarios para avanzar e a concreción de compromisos e accións de mellora.
Cun enfoque práctico, o curso permitirá elaborar un plan persoal de acción para trasladar a reflexión a decisións concretas, establecer prioridades e definir os seguintes pasos no desenvolvemento individual e profesional. Está dirixido tanto a persoas que atravesan procesos de transición como a aquelas que, aínda estando satisfeitas coa súa situación actual, desexan prepararse para unha nova etapa.
A formación poderá seguirse presencialmente na sede da UNED de Lugo ou en liña, tanto en directo como en diferido. Terá unha duración total de dez horas, incluído o traballo autónomo, e ten recoñecidos 0,5 créditos ECTS, actualmente en trámite.
A iniciativa forma parte do ciclo "Saúde e Coidados" da UNED de Lugo, dirixido por Raquel Iglesias Rodríguez, coordinadora de Extensión Universitaria do centro, e conta coa colaboración da Deputación e do Concello de Lugo.