Pedaladas de coraxe: 500 quilómetros en bicicleta para demostrar que co párkinson tamén se pode
Hai persoas que miden o camiño en quilómetros e outras que o fan en retos superados. Para Cristóbal Budiño, natural de Moaña e residente en Ribeira, cada pedalada representa ambas as cousas. O vindeiro 22 de agosto iniciará un percorrido de máis de 500 quilómetros en bicicleta que o levará a atravesar as catro provincias galegas ata chegar a Santiago de Compostela.
Baixo o nome de Pedaladas de coraxe, Budiño quere lanzar unha mensaxe clara: ter párkinson non significa ter que renunciar a unha vida activa nin aos proxectos persoais. O percorrido partirá de Ribeira e pasará por Moaña, A Cañiza, Ourense, Portomarín, Lugo e Melide antes de rematar en Santiago o 28 de agosto.
A vida de Cristóbal deu un xiro en 2023, cando, despois de dúas décadas traballando no sector do petróleo e da enerxía, entre barcos e plataformas, recibiu o diagnóstico dunha enfermidade neurodexenerativa que cambiou a súa rutina, pero non a súa maneira de afrontar o futuro.
“Podía ver o párkinson como un final. Decidín velo como o inicio dunha nova ruta”, resume. Lonxe de parar, atopou na bicicleta unha ferramenta para manterse activo, coidar a súa saúde e contribuír a dar visibilidade a unha enfermidade que, segundo destaca, continúa rodeada de prexuízos e estereotipos.
En Galicia conviven con esta enfermidade máis de 13.000 persoas, moitas delas diagnosticadas en idades cada vez máis temperás. Porén, o imaxinario colectivo continúa asociando o párkinson principalmente coa vellez e co tremor, cando se trata dunha doenza moito máis complexa, con síntomas motores e non motores que poden afectar de maneira diferente a cada persoa.
“Quero que a xente vexa que detrás dun diagnóstico seguen existindo proxectos, soños e ganas de vivir”, explica Budiño. Para el, ademais, esta viaxe ten unha motivación especialmente persoal: as súas dúas fillas. Elas son o motor que impulsa cada unha das súas pedaladas e ás que pretende transmitir, a través do exemplo, que as dificultades non sempre se poden escoller, pero si a maneira de afrontalas.
“Quero que saiban que, pase o que pase, sempre paga a pena seguir adiante”, sinala.
A verdadeira meta deste moañés afincado en Ribeira, con todo, vai moito máis alá dos 500 quilómetros do percorrido. O seu obxectivo é contribuír a que a sociedade observe o párkinson desde outra perspectiva, lembrando que un diagnóstico non define unha persoa e que, mesmo cando o camiño cambia de dirección, sempre é posible seguir pedaleando.
Pedaladas de coraxe é tamén un reto colectivo que conta co apoio de entidades vinculadas á promoción de hábitos de vida saudables, ao acompañamento das persoas con párkinson e á visibilización da enfermidade. Entre elas están Eroski-Vegalsa, Manu Milán Centro de Adestramento, Grupo Stier, Carlos Alonso Fisioterapia, Teumobil Telco, Revolutrion, Zico Sport, Dalle Pedal, Algaba, Alma de Candela, o Concello de Moaña e Almacenes Canducho.
O percorrido comezará o 22 de agosto con a etapa entre Ribeira e Moaña. Ao día seguinte, Budiño afrontará o tramo entre Moaña e A Cañiza, mentres que o día 24 será a quenda de A Cañiza a Ourense. O 25 de agosto percorrerá o camiño entre Ourense e Portomarín; o 26, entre Portomarín e Lugo; o 27, entre Lugo e Melide; e finalmente, o 28 de agosto, completará a última etapa entre Melide e Santiago de Compostela.
Con esta iniciativa, Cristóbal Budiño pretende que cada quilómetro sirva para derrubar ideas preconcebidas e demostrar que o párkinson non ten por que marcar os límites dunha vida activa, con ilusión e novos retos.