Piden melloras nos aparcadoiros do HULA polo seu mal estado
A Federación de Asociacións Veciñais da Provincia de Lugo dirixiuse á Consellería de Sanidade da Xunta de Galicia e á Concellería de Vías e Obras do Concello de Lugo para trasladar a crecente inquedanza da veciñanza pola situación dos aparcadoiros do Hospital Universitario Lucus Augusti (HULA).
Nos últimos meses, a entidade recibiu numerosas queixas de persoas usuarias do centro hospitalario que denuncian que o estacionamento cuberto resulta insuficiente para dar resposta á demanda diaria. Esta circunstancia obriga a moitos pacientes e acompañantes a deixar os seus vehículos nas áreas exteriores do recinto, onde na actualidade non existen espazos acondicionados nin cubertos abondo.
A problemática intensifícase de maneira especial nas xornadas de chuvia, afectando a familias con bebés, persoas maiores e persoas dependentes que acoden ao hospital. Segundo trasladan, resulta complexo atopar unha praza axeitada que permita baixar con seguridade un bebé para colocalo no seu carriño ou asistir unha persoa maior en cadeira de rodas sen que se molle ou teña que percorrer longas distancias baixo condicións meteorolóxicas adversas.
As persoas usuarias tamén alertan do deterioro do firme nas zonas exteriores de estacionamento, onde se rexistran fochancas e acumulacións de auga que dificultan aínda máis a mobilidade das persoas con mobilidade reducida e contribúen ao desgaste prematuro do pavimento.
Ante esta situación, a Federación solicita á Consellería de Sanidade da Xunta de Galicia que estude a ampliación e mellora das áreas de estacionamento dentro do recinto hospitalario, habilitando novas prazas e valorando a súa cubrición. Do mesmo xeito, reclama á Concellería de Vías e Obras do Concello de Lugo que promova actuacións para acondicionar e cubrir os aparcadoiros exteriores vinculados ao hospital, mellorando o firme para evitar o seu deterioro e garantir un acceso digno e seguro ás persoas usuarias.
Desde a entidade consideran que se trata dunha cuestión de accesibilidade, dignidade e seguridade, especialmente ao tratarse dun centro sanitario de referencia ao que acoden a diario persoas en situación de vulnerabilidade.