Política

A formación anuncia que non participará en concentracións ou manifestacións que sinalen as persoas migrantes e reclama vías seguras e legais para migrar

Podemos Lugo expresou o seu rexeitamento a calquera convocatoria ou iniciativa relacionada coa situación vivida en Ceuta que, ao seu xuízo, poida contribuír á difusión de discursos racistas ou xenófobos.

A formación considera que a resposta aos acontecementos das últimas semanas debe centrarse na defensa dos dereitos humanos e no cumprimento do dereito internacional, e non na criminalización das persoas que abandonan os seus lugares de orixe por motivos como a guerra, a pobreza ou a falta de oportunidades. Neste sentido, reclama tamén a creación de vías seguras e legais para a migración.

Podemos Lugo avanzou que non secundará nin participará en concentracións ou manifestacións que teñan como finalidade sinalar as persoas migrantes ou promover a confrontación entre diferentes colectivos da sociedade.

A voceira da formación en Lugo, Ximena Cheda, asegurou que "as persoas migrantes non son o problema. O problema son unhas políticas migratorias que levan anos convertendo as fronteiras en espazos de sufrimento, violencia e vulneración de dereitos humanos".

Cheda criticou tamén o uso do medo como ferramenta para xerar enfrontamentos entre a cidadanía. "Non aceptamos que se utilice o medo para enfrontar á xente traballadora entre si, nin que se busquen chivos expiatorios entre quen se atopa nunha situación de maior vulnerabilidade. A solidariedade sempre será máis útil que o odio", afirmou.

A organización considera que a situación actual debe servir tamén para abrir un debate sobre o papel dos gobernos europeos e do Estado español na xestión das fronteiras e dos fluxos migratorios. Neste punto, a voceira sostén que existe un tratamento desigual en función da procedencia e das características das vítimas. "Se as vítimas fosen europeas, brancas e occidentais, a resposta política e mediática sería moi diferente. Todas as vidas teñen o mesmo valor e todos os dereitos humanos deben ser garantidos sen excepción", sinalou.

Desde Podemos Lugo defenden unha resposta centrada na protección da vida, a cooperación internacional e o respecto polos dereitos humanos, así como na creación de vías seguras para migrar, fronte ás iniciativas que consideran que poden favorecer a expansión do racismo e a xenofobia.

"Lugo é unha cidade aberta, diversa e acolledora. Non imos permitir que o odio atope espazo nas nosas rúas nin nas nosas institucións", concluíu Ximena Cheda.