Podemos Lugo solicita o apoio do Concello ao desbloqueo da Lei de Nacionalidade Saharauí
Podemos Lugo rexistrou no Concello un requirimento institucional co obxectivo de instar á Corporación municipal a apoiar o desbloqueo da Proposición de Lei de Nacionalidade Saharauí, actualmente en fase de tramitación no Congreso dos Deputados. A formación solicita tamén o recoñecemento dos dereitos históricos das persoas saharauís nacidas durante o período no que o Sáhara Occidental estivo baixo administración española.
A iniciativa forma parte dunha campaña promovida por Podemos Galicia en diferentes concellos do territorio galego para conseguir respaldo institucional a unha medida que a organización considera unha cuestión de xustiza histórica. Segundo explican, a proposta permitiría facilitar o acceso á nacionalidade española ás persoas saharauís nacidas durante a etapa de administración española do territorio, así como aos seus descendentes.
Desde Podemos Lugo lembran a relación de solidariedade mantida durante décadas entre Galicia e o pobo saharauí a través do labor desenvolvido por familias acolledoras, asociacións de amizade e entidades sociais participantes en programas como Vacacións en Paz.
Segundo sinalan, Lugo forma parte desde hai anos desta rede solidaria galega. Familias da cidade participan de forma continuada no programa Vacacións en Paz e o Concello colaborou e participou ao longo do tempo en diferentes accións de apoio e acollida, recoñecendo publicamente o traballo das familias e entidades implicadas nesta iniciativa.
A voceira do Círculo de Podemos Lugo, Ximena Cheda, asegurou que «a solidariedade que durante anos demostraron as familias galegas e lucenses co pobo saharauí debe ter tamén unha expresión política e institucional. Non estamos ante unha cuestión migratoria, senón ante unha cuestión de xustiza histórica e de recoñecemento de dereitos».
Cheda engadiu que Galicia «foi exemplo de solidariedade co pobo saharauí durante décadas» e considerou que agora corresponde ás institucións asumir ese compromiso e contribuír a desbloquear unha iniciativa que, ao seu xuízo, pretende reparar unha situación de desprotección prolongada durante preto de cincuenta anos.
Podemos Lugo considera especialmente preocupante que unha proposta admitida a trámite e respaldada por unha ampla maioría parlamentaria continúe paralizada sen que o Congreso dos Deputados poida debater e pronunciarse sobre ela.
Neste sentido, a voceira indicou que «resulta difícil explicar ás familias acolledoras, ás entidades solidarias e ás propias persoas afectadas que unha proposta con respaldo suficiente para continuar avanzando permaneza bloqueada por cuestións procedimentais. O mínimo esixible nunha democracia é que poida ser debatida e votada».
A formación tamén subliña o papel dos concellos como administracións máis próximas á cidadanía e considera que teñen unha función relevante na defensa dos dereitos humanos e na promoción de valores vinculados á solidariedade e á cooperación entre pobos.
Cheda destacou ademais a implicación de numerosas familias lucenses nesta causa e afirmou que «hai familias da nosa cidade que levan anos abrindo as portas das súas casas a nenos e nenas saharauís, compartindo o seu día a día e construíndo vínculos que duran toda a vida». Por este motivo, considera que o Concello debería apoiar o desbloqueo desta lei.
Co rexistro deste requirimento, Podemos Lugo fai un chamamento ao conxunto dos grupos municipais para apoiar a iniciativa e contribuír a que a cidade se sume á demanda de desbloqueo da Proposición de Lei de Nacionalidade Saharauí e ao recoñecemento da débeda histórica que, segundo a formación, o Estado español mantén co pobo saharauí.
A organización concluíu reafirmando o seu compromiso coa defensa dos dereitos humanos, da legalidade internacional e da solidariedade entre pobos, ao tempo que reiterou o seu apoio ás reivindicacións históricas do pobo saharauí.