Portomarín acolle este sábado a IV edición dos Cantos de Taberna e VII Foliada
Portomarín acollerá este sábado, 26 de setembro, a cuarta edición dos Cantos de Taberna e VII Foliada, unha xornada dedicada á música e á cultura tradicional galega que reunirá durante todo o día actuacións, baile, gastronomía e diferentes propostas de convivencia.
A programación comezará ás 11:30 horas cun obradoiro de baile impartido por Miguel Carballo. Ás 13:15 horas terá lugar a sesión vermú, amenizada por Axeigo, dando paso pola tarde aos Cantos de Taberna, que comezarán ás 18:00 horas.
Na programación tamén figura unha cea popular ás 21:30 horas, seguida ás 22:15 da mostra dos grupos participantes. Ás 23:30 horas celebrarase o concurso da queimada e, a partir das 23:59 horas, terá lugar o concerto de Airinhos da Freba, que poñerá o broche musical á xornada.
Nesta edición participarán agrupacións procedentes de diferentes localidades galegas. Entre elas estarán A.C. Mestura de Nete, de Vilalba; A.C. Palacio do Rei, de Palas de Rei; A.C. Os Xílgaros, de Lugo; Axeigo, de Rábade; Foliada de Remior, de Lugo; Nós é o noso, de Melide; Os Minstreles, de Monforte de Lemos; Rechouchíos, de Taboada; e A.C. Río Miño, de Portomarín.
A celebración contará tamén coa participación de varios establecementos hostaleiros da localidade, que se sumarán á programación para contribuír ao ambiente de taberna e á dinamización da xornada.
A iniciativa conta coa colaboración do Concello de Portomarín, Tradigali e a Vicepresidencia da Deputación de Lugo, a través da área de Cultura, e busca poñer en valor a música, o baile e as tradicións populares galegas nunha xornada aberta á veciñanza e ás persoas visitantes.