Portomarín conmemora o Día Internacional da Muller con diversas actividades
O Concello de Portomarín pon en marcha un programa especial para celebrar o Día Internacional da Muller, convidando a toda a veciñanza a participar nas actividades organizadas para esta ocasión.
O sábado 8 de marzo terá lugar a andaina 'Que reine o bo trato', unha marcha que busca fomentar o respecto e a igualdade. O punto de encontro será ás once da mañá na Praza do Camiño. Ademais, como incentivo para a participación, os cen primeiros inscritos recibirán un agasallo que incluirá unha mochila, un bocadillo, froita e auga.
A programación continuará o domingo 9 de marzo cun curso de defensa persoal, que se impartirá a partir das dez da mañá no Pazo Xeral Paredes. Trátase dunha sesión teórica e práctica dirixida por un profesional, na que se ofrecerán ferramentas para que as mulleres saiban como actuar ante unha posible agresión. Tras a formación, haberá un aperitivo para todas as persoas asistentes.
Este programa conta coa colaboración da Asociación de Mulleres Rurais 'O Xaramago'. As persoas interesadas en participar na andaina ou no curso poderán inscribirse ata o xoves 6 de marzo chamando ao número de teléfono 621 197 440.
Con estas actividades, Portomarín reafirma o seu compromiso coa igualdade e a seguridade das mulleres, promovendo a súa participación activa nunha data tan significativa.