Portomarín, Palas de Rei e Monterroso impulsan un obradoiro dual de emprego conxunto
Os concellos de Portomarín, Palas de Rei e Monterroso uniron esforzos para poñer en marcha un proxecto conxunto de obradoiro dual de emprego que ofrecerá formación e experiencia laboral a vinte persoas desempregadas ao longo dun ano. A actuación, financiada pola Xunta de Galicia cun orzamento de 450.000 euros, céntrase nas especialidades de xardinería e promoción turística local e información ao visitante.
As persoas participantes recibirán formación teórica e práctica, ao tempo que desenvolverán actuacións e prácticas profesionais en distintos puntos dos tres concellos, combinando aprendizaxe e experiencia real en servizos de interese público vinculados ao mantemento de espazos verdes e á dinamización turística.
Os alcaldes de Portomarín, Eloy Pérez, de Palas de Rei, Pablo Rivas, e de Monterroso, Pablo Taboada, presentaron esta iniciativa de inserción laboral que busca mellorar a empregabilidade da mocidade e favorecer a súa incorporación ao mercado de traballo. Unha vez rematado o obradoiro, as persoas participantes poderán ser contratadas por empresas da zona por un período mínimo de tres meses a xornada completa.