Preséntase o programa de Concertos Didácticos da Banda Municipal de Lugo
Preséntase o programa de Concertos Didácticos da Banda Municipal para o curso 2025, unha iniciativa que ten como obxectivo achegar a música ás crianzas e fomentar o coñecemento e a sensibilidade artística nos centros educativos da cidade.
A iniciativa, presentada pola concelleira de Cultura, Turismo e Promoción da Lingua, Maite Ferreiro, xunto coa xefa do servizo de Educación do Concello e o director da Banda Municipal, David Fiuza, permite garantir o acceso á música e á cultura desde as idades máis temperás.
A concelleira subliñou, ademais, que este ciclo ofrece a oportunidade de que as e os estudantes dos diferentes centros educativos podan escoitar e interactuar coa Banda, coñecendo de primeira man os instrumentos, os estilos e o traballo colectivo que require unha formación musical deste tipo.
O programa desenvolverase entre os meses de maio e xuño, con 14 concertos previstos en centros de ensino infantil e primaria, o que permitirá que case todas as nenas e nenos de Lugo participen nesta actividade. As actuacións adaptaranse aos diferentes ciclos educativos, para que cada concerto se axuste á idade e ao nivel de coñecemento do alumnado.
O calendario de concertos é o seguinte: o mércores 14 de maio será o turno da EIM Serra de Outes, o xoves 15 de maio actuará no CEIP Luis Pimentel, e o martes 20 de maio será no CEIP Paradai. O mércores 21 de maio a Banda visitará a EIM Gregorio Sanz, e o xoves 22 de maio será no CEIP Quiroga Ballesteros. O martes 27 de maio haberá un concerto no CEIP A Ponte, e o mércores 28 de maio será no CEIP Anexa. O xoves 29 de maio a Banda actuará no CEIP As Mercedes, e o martes 10 de xuño será no CEIP Albeiros. O mércores 11 de xuño estará no CEIP Nadela, e o xoves 12 de xuño na CEE Santa María. O martes 17 de xuño a Banda visitará o CEIP As Gándaras, o mércores 18 de xuño será no CEIP Sagrado Corazón, e finalmente, o xoves 19 de xuño rematarán os concertos na Escola Infantil Fingoi nº2.