Rábade organiza un “Recheo de Verán” con sorteo de agasallos e cafeciño para o público adulto
O Concello de Rábade celebrará este sábado, 4 de xullo, unha actividade dirixida ao público adulto baixo o nome de Recheo de Verán, unha proposta lúdica que combinará un sorteo de agasallos cun encontro social acompañado dun cafeciño.
A cita terá lugar ás 20.00 horas no Centro Sociocultural de Rábade e está concibida como unha actividade gratuíta destinada a favorecer a participación veciñal e ofrecer unha alternativa de lecer durante a tempada estival.
As persoas interesadas en participar deberán formalizar previamente a súa inscrición na Área de Cultura e Deporte do Concello. O prazo para anotarse permanecerá aberto ata hoxe, 2 de xullo.
Desde o Concello animan á veciñanza a sumarse a esta iniciativa, que permitirá desfrutar dunha tarde de convivencia e optar aos diferentes agasallos que se sortearán durante o evento.