RadioVisual do Patrimonio levou a Ribeira de Piquín coa música e a memoria da familia Seivane
A Área Recreativa de Chao de Pousadoiro, en Ribeira de Piquín, acolleu a terceira parada do RadioVisual do Patrimonio, unha iniciativa que volveu poñer en valor a transmisión cultural entre xeracións a través da música, a palabra e a participación da comunidade. O evento contou co protagonismo do alumnado e profesorado do CEIP Poeta Avelino Díaz e do IES Pedregal de Irimia de Meira, así como coa destacada presenza da familia Seivane.
A xornada estivo conducida polo xornalista Xosé Manuel Diego Ferreira, quen abriu a emisión destacando a continuidade da tradición galega como unha cadea viva de voces, mans e memoria que une xeracións. Desde as 12:00 horas, o programa desenvolveuse en directo e puido seguirse a través das plataformas dixitais do proxecto, xerando un espazo de encontro entre territorio, mocidade e patrimonio.
Durante o evento, o alumnado participou activamente formulando preguntas e compartindo contidos propios, nunha experiencia que tamén contou coa intervención do alcalde, Roberto Fernández Rico. A recuperación da memoria colectiva tivo tamén protagonismo a través de testemuños como o de Álex e o seu avó Félix, gandeiro xubilado, ou dos recordos familiares achegados por Iria.
Un dos momentos máis destacados foi a participación da familia Seivane, vinculada historicamente á construción de gaitas. A recoñecida gaiteira Susana Seivane ofreceu unha actuación en directo acompañada por varios familiares, mentres que o seu pai, o artesán Álvaro Seivane, compartiu tamén a súa experiencia e coñecementos nos micrófonos. A xornada pechouse coa interpretación da Muiñeira do Chao, unha peza de forte arraigamento local composta polo avó da artista, Xosé Manuel Seivane.
O RadioVisual do Patrimonio está impulsado por Casa de Tolos e a Asociación Ponte... nas Ondas!, ao abeiro da liña Territorio Cultura da Axencia Galega de Industrias Culturais. Trátase dun proxecto de dinamización cultural, educativa e social que percorre as rutas xacobeas mediante eventos participativos en directo.
Tras as paradas en Cea e Muros, e esta terceira cita na Ribeira de Piquín, a iniciativa continuará nas vindeiras semanas por Mondariz-Balneario, Castro de Rei e Quiroga.