Rayo Lugo FS: un equipo nado das ganas de xogar, competir e gozar do fútbol sala
Jessica Fernández
O fútbol sala lucense conta esta tempada cun novo equipo. O Rayo Lugo FS nace dunha idea tan sinxela como ambiciosa: reunir un grupo de mozos que querían xogar xuntos e crear o seu propio espazo para competir, gozar do deporte e intentar facerse un oco nas categorías superiores.
Segundo explican os seus promotores, Fernando Yáñez e Teresa López, o proxecto xurdiu a raíz do interese dos seus fillos e do seu grupo de amigos por xogar ao fútbol sala. A dificultade para atopar un equipo que puidese incorporar a todos eles levounos a tomar a decisión de dar un paso adiante e poñer en marcha o seu propio club.
"Tiñan ganas de xogar e decidimos facelo nós", explican. Non se trata, ademais, da súa primeira experiencia á fronte dun proxecto destas características. Hai entre doce e trece anos xa impulsaron outro club de fútbol sala, polo que coñecen parte do traballo que supón poñer en marcha un equipo desde cero.
Agora o Rayo Lugo FS comeza o seu camiño en Segunda División Sénior Local, aínda que as súas aspiracións van máis alá de participar. O obxectivo deportivo que se marcaron é claro: competir polo campionato e lograr o ascenso. A intención é facelo desde a ambición, pero sen perder de vista o motivo que deu orixe ao proxecto. "Queremos pasalo ben e gañar a liga", sinalan os seus promotores. Esa combinación entre gozo e competitividade forma parte da filosofía coa que queren construír o equipo.
O conxunto está formado actualmente por once xogadores e conta cun adestrador que, ao mesmo tempo, forma parte do cadro. A porta, con todo, permanece aberta a novas incorporacións. Desde o club aseguran que buscan xogadores que compartan a maneira de entender o proxecto e que acheguen tanto desde o punto de vista deportivo como humano.
A actitude é un dos aspectos que consideran fundamentais. Falan de compromiso, calidade, capacidade de superación e espírito competitivo como algunhas das características que queren que identifiquen o Rayo Lugo FS. A intención é medrar progresivamente e que o equipo poida ir dando pasos cara a categorías de maior nivel.
Un proxecto que busca facerse un oco en Lugo
Poñer en marcha un equipo desde cero tamén implica asumir unha serie de gastos. A equipación, as fichas, os seguros, o material deportivo ou o alugueiro das instalacións forman parte das necesidades de calquera club. Neste caso, a Clínica Dental Mosquera Otero converteuse no patrocinador principal do proxecto e, segundo explican os seus promotores, o seu apoio resulta fundamental para poder comezar esta nova etapa.
Os adestramentos teñen lugar os martes ás 22.30 horas no Seminario, unha instalación cuxo alugueiro tamén supón un custo para o club. De cara ao futuro, os seus responsables esperan poder establecer vías de colaboración coas administracións e dispoñer dun espazo que facilite os adestramentos e permita consolidar o proxecto.
Máis alá das cuestións económicas, o Rayo Lugo FS quere converterse nunha iniciativa deportiva con presenza na cidade. Os seus promotores aseguran que un dos seus propósitos é "dinamizar a vida deportiva de Lugo" e conseguir que o novo equipo sexa coñecido e teña continuidade.
A idea, polo tanto, non remata con esta primeira tempada. O proxecto nace coa intención de medrar a partir da experiencia deste primeiro ano, sumar xogadores, mellorar os seus recursos e seguir avanzando na competición.
O Rayo Lugo FS comeza así o seu percorrido desde a categoría local, pero cunha meta definida: competir, gozar e tratar de conquistar títulos. O reto será trasladar ao campo a ilusión coa que os seus promotores puxeron en marcha unha iniciativa que naceu, precisamente, das ganas dun grupo de amigos de seguir xogando xuntos.