Reclaman unha reparación definitiva da estrela ornamental da rúa Divina Pastora
A Asociación de Veciños, Comerciantes e Industriais de A Milagrosa trasladou publicamente á Concellería de Vías e Obras do Concello de Lugo a necesidade urxente de acometer no ano 2026 unha reparación axeitada e definitiva da estrela ornamental situada no pavimento da rúa Divina Pastora, na súa confluencia co Camiño Real.
A rúa Divina Pastora, primeira vía peonilizada do barrio, consolidouse co paso dos anos como un espazo emblemático e moi frecuentado, con actividade comercial constante, terrazas, tránsito continuo e a presenza dun centro educativo. Trátase dun punto de encontro habitual para familias, alumnado e veciñanza, ademais dun eixo fundamental para a vida económica de A Milagrosa.
Neste contexto, a estrela decorativa integrada no pavimento, un elemento singular e simbólico da rúa, presenta na actualidade un notable estado de deterioro. Segundo lembra a asociación, no seu momento foi obxecto dunha reparación provisional mediante unha aplicación de cemento que resultou pouco coidada desde o punto de vista estético e que, ademais, volveu deteriorarse noutras zonas, ofrecendo unha imaxe de abandono impropia dun espazo tan concorrido.
Desde a entidade veciñal consideran imprescindible que se leve a cabo unha intervención técnica adecuada, empregando materiais e acabados acordes coa contorna, que garantan tanto a durabilidade como a seguridade do pavimento. A presenza diaria de nenos e nenas na zona incrementa, segundo subliñan, a urxencia dunha actuación correcta que evite riscos e contribúa a manter a calidade urbana do barrio.
Por todo iso, a Asociación de Veciños, Comerciantes e Industriais de A Milagrosa solicita á Concellería de Vías e Obras que esta actuación se inclúa na planificación municipal de 2026 e que se aborde coa seriedade e o coidado que merece un espazo tan representativo para o barrio.