Rematan as obras previas á reforma integral da rúa Fermín Rivera en Lugo
O Concello de Lugo informou do remate das obras previas á reforma integral da rúa Fermín Rivera, que acometerá a Confederación Hidrográfica Miño-Sil (CHMS) segundo o protocolo asinado co municipio. Desde o luns, levaronse a cabo traballos de limpeza nos colectores de saneamento, especialmente no treito comprendido entre o Club Fluvial e a Ponte Romana, considerado o máis afectado pola acumulación de residuos.
Estas tarefas finalizaron na tarde de onte, tras o uso de camións de gran potencia para lavar con auga a presión os colectores e proceder á succión dos restos e lixo acumulado. Ademais, introduciron cámaras para comprobar o estado actual das canalizacións, o que permitirá planificar con maior eficiencia e seguridade a reforma integral da vía.
Concluída esta fase, a brigada municipal de sinalización comezou a retirar as vallas de obra, permitindo que os veciños recuperen os espazos de estacionamento en ambas marxes da rúa.
O alcalde, Miguel Fernández, destacou que estas actuacións previas son fundamentais para garantir unha execución áxil e planificada da reforma, que suporá un gran cambio a nivel urbano e fluvial no proxecto deseñado para a contorna do barrio da Ponte.