Rosa María Rivas asume a dirección da Unidade de Violencia contra a Muller da Subdelegación do Goberno en Lugo
A subdelegada do Goberno en Lugo, Olimpia López, deu a benvida a Rosa María Rivas como nova xefa da Unidade de Violencia contra a Muller da Subdelegación do Goberno, tras a publicación do seu nomeamento no Boletín Oficial do Estado (BOE).
Olimpia López destacou a relevancia deste servizo, encargado de coordinar a loita contra a violencia de xénero na provincia, e subliñou a responsabilidade que asume a nova responsable á fronte dun ámbito prioritario. Neste sentido, sinalou que traballará en coordinación coas forzas e corpos de seguridade do Estado, a Administración de Xustiza e o resto das administracións públicas para garantir a protección das vítimas da violencia machista.
A subdelegada puxo en valor a traxectoria profesional de Rosa María Rivas, destacando a súa formación en materia de igualdade, o seu coñecemento da provincia e a experiencia acumulada na Administración Xeral do Estado.
Natural de Lugo, Rosa María Rivas traballa na Subdelegación do Goberno desde o ano 2012. Funcionaria da Administración do Estado desde 2006, nos últimos anos desempeñou o cargo de xefa da Sección de Estranxeiría. Agora substitúe nesta responsabilidade a María Luisa Castro.
A nova responsable da Unidade de Violencia contra a Muller conta ademais con formación específica en igualdade e violencia de xénero, a través de diversos cursos impartidos polos ministerios de Política Territorial e de Igualdade, centrados en cuestións como a igualdade de oportunidades ou o uso non sexista da linguaxe, entre outras materias.