Rosa Moledo e os presentadores dos Mestre Mateo protagonizan un encontro co público en Lugo
Lugo acolleu un encontro aberto ao público celebrado no Vello Cárcere no que participaron os presentadores da gala dos XXIV Premios Mestre Mateo, Trisha Fernández e Federico Pérez, xunto coa Premio de Honra desta edición, Rosa Moledo. A cita permitiu ás persoas asistentes coñecer de primeira man ás protagonistas e protagonistas da gala que cada ano recoñece o mellor do audiovisual galego.
Durante o acto, os dous presentadores mantiveron unha conversa con Rosa Moledo, distinguida nesta edición co Premio de Honra Fernando Rey. O encontro serviu para repasar a súa traxectoria profesional e achegar ao público o traballo que se realiza detrás das producións audiovisuais.
A Academia Galega do Audiovisual decidiu concederlle este recoñecemento pola súa carreira de máis de trinta anos como asesora lingüística e tradutora, cunha extensa vinculación co sector audiovisual galego. A entidade destacou especialmente o seu rigor no uso da lingua, o seu compromiso coa promoción do galego e a súa achega á calidade das producións de cinema, televisión e plataformas audiovisuais.
Ao longo da súa carreira profesional, Moledo participou na tradución e adaptación lingüística de numerosos títulos para cinema e televisión, entre eles A lingua das bolboretas, Os luns ao sol, O lapis do carpinteiro, Cela 211, Engurras, Os fenómenos ou O noso último verán en Escocia, entre outros.
A concelleira de Cultura de Lugo, Maite Ferreiro, destacou a relevancia de que a cidade acolla actividades relacionadas cos Premios Mestre Mateo e sinalou que “este encontro permitiu achegar ao público lucense ás persoas que están detrás da gran festa do audiovisual galego, coñecendo de preto o seu traballo e a súa traxectoria”. A edil tamén subliñou que “contar coa presenza de Rosa Moledo, unha profesional cunha carreira tan destacada e comprometida coa lingua galega, é unha oportunidade para poñer en valor o papel da lingua na creación audiovisual”.
Pola súa banda, o delegado territorial da Xunta en Lugo, Javier Arias, salientou o papel dos Premios Mestre Mateo “para proxectar socialmente e mostrar cara ao exterior o talento, a capacidade e a calidade do audiovisual galego”.
Arias realizou estas declaracións nun acto organizado na cidade pola Academia Galega do Audiovisual dentro da programación dos premios, protagonizado pola lingüista e tradutora Rosa Moledo, que recibirá o Premio de Honra, e polos actores Trisha Fernández e Federico Pérez, encargados de conducir a gala.
A cerimonia de entrega dos galardóns celebrarase o 21 de marzo no auditorio Fuxan os Ventos, que o delegado definiu como “un escenario axeitado para a ocasión, construído pola Xunta de Galicia para que a cidade poida acoller eventos desta magnitude”.
Neste sentido, Arias indicou que o apoio da Administración autonómica ao sector cultural reflíctese “na mellora das infraestruturas e no cofinanciamento de proxectos a través de programas de axudas, entre eles moitos dos finalistas desta edición dos Premios Mestre Mateo”.