Sandra González representará a España no Europeo Off Road de trail en Eslovenia
A atleta lucense Sandra González (Lugo, 2007), integrante da Escola Atlética Lucense, formará parte da selección española que participará no Campionato de Europa Off Road, unha das citas máis destacadas do calendario continental das carreiras de montaña e trail. A competición celebrarase o domingo 7 de xuño en Ljubljana-Kamnik, en Eslovenia.
A deportista competirá na proba Up and Down Race, unha carreira de 6 quilómetros na categoría sub-20, na que se darán cita algunhas das mellores promesas europeas da especialidade. A súa convocatoria coa selección española supón un novo recoñecemento á excelente progresión que vén demostrando nos últimos meses.
Entre os logros máis destacados da atleta figura o récord de España sub-20 de medio maratón, conseguido o pasado mes de marzo durante a disputa da Coruña21. Nesa competición asinou unha marca de 1 hora, 17 minutos e 38 segundos, un rexistro que a situou como a mellor española da historia da categoría na distancia.
A súa traxectoria recente tamén está marcada pola experiencia internacional. Sandra González xa vestiu a camiseta da selección española en competicións de máximo nivel, participando tanto no Campionato do Mundo de Cross disputado en Florida como no Campionato de Europa de Campo a Través celebrado en Portugal.
No ámbito autonómico e local, a atleta tamén continúa acumulando éxitos. Recentemente proclamouse vencedora do Medio Maratón Cidade de Lugo, onde ademais estableceu un novo récord da proba na distancia de 10 quilómetros, confirmando o gran momento de forma que atravesa.
A participación no Europeo Off Road supón un novo paso na carreira deportiva da lucense, que continúa consolidándose como unha das grandes promesas do atletismo español de fondo e trail.