Santiago de Meda celebrará a súa festa patronal cunha xornada de música, verbena e tradición
A parroquia de Santiago de Meda, no municipio de Castroverde, celebrará o vindeiro 18 de xullo as súas festas na honra de Santiago Apóstolo cun programa que combinará os actos relixiosos coa música e o ambiente festivo ao longo de toda a xornada.
A programación comezará ás 13.00 horas coa celebración da misa solemne na honra do patrón. A continuación terá lugar a tradicional sesión vermú, que estará amenizada pola orquestra M3 Show.
Xa pola noite, a partir das 23.30 horas, celebrarase a festa e verbena, tamén a cargo da orquestra M3 Show, que ofrecerá un amplo repertorio para animar a veciños e visitantes. A música prolongarase coa actuación do DJ Adolfo Valiño, encargado de poñer o broche final á celebración.
A comisión organizadora convida á veciñanza e ao público en xeral a participar nunha cita que volverá converter Santiago de Meda nun punto de encontro para compartir unha xornada de convivencia, tradición e diversión.