Suspendida a Feira de artesanía de Outeiro de Rei
![feira da artesania outeiro de rei](https://lugoxa.com/wp-content/uploads/2021/05/feira-da-artesania-outeiro-de-rei.jpg)
O Concello de Outeiro de Rei acordou por segundo ano consecutivo a suspensión da Feira da Artesanía de Outeiro de Rei prevista para o primeiro sábado do mes de xullo.
Aínda que situación actual, derivada da crise sanitaria ocasionada pola covid-19, é bastante mellor que a do ano pasado por estas datas, a incerteza que aínda acompaña a evolución da pandemia, unido á necesidade de tomar unha decisión cunha certa antelación tratando de evitar maiores prexuízos a expositores e empresas subministradoras dos servizos que require este evento, determinaron non alargar máis a toma desta decisión por parte do goberno municipal.
Evidentemente, non é unha decisión fácil a cancelación deste popular evento que normalmente atrae a preto de cen expositores e numeroso público a esta localidade, anulación que seguramente supón un esforzo para as persoas que virían a gozar da feira pero seguramente moito máis, para aquelas outras que virían a traballar na mesma; tamén para o propio Concello de Outeiro de Rei que espera que a feira teña continuidade o próximo ano.