Tradime impartirá en Lugo un curso gratuíto sobre tacógrafo dixital para condutores
A Asociación de Empresarios de Transporte de Mercancías por Carretera de Lugo (Tradime) ten previsto impartir o próximo 30 de maio un curso de tacógrafo dixital orientado a condutores do sector do transporte de mercadorías por estrada.
Esta formación permitirá aos participantes dominar o funcionamento do tacógrafo dixital e intelixente, así como coñecer a normativa vixente en materia de tempos de condución e descanso. Ademais, o curso abordará a realización correcta das entradas manuais co obxectivo de evitar posibles sancións.
A actividade desenvolverase en modalidade presencial nas instalacións do Centro de Formación e Escola de Empresarios da Confederación de Empresarios de Lugo (CEL), situadas na rúa Manuel Murguía número 6 baixo, en Lugo. O horario previsto será de 9:00 horas a 13:30 horas, cun descanso intermedio de media hora.
O curso será totalmente gratuíto e está financiado polo Goberno de España a través do Ministerio de Transportes e Mobilidade Sostible con cargo ao plan de axudas correspondente á presente anualidade.