Transparencia dá dez días a Augas de Galicia para responder a Ulloa Viva sobre a captación de auga de Altri
A Comisión da Transparencia de Galicia estimou a reclamación presentada pola Plataforma Ulloa Viva contra o silencio administrativo de Augas de Galicia ante tres solicitudes de acceso ao expediente da captación de auga solicitada por Altri para o seu proxecto de macrocelulosa en Palas de Rei. A petición contempla a extracción de 46 millóns de litros diarios durante un período de 75 anos.
A resolución insta a Augas de Galicia a responder á solicitude de información no prazo máximo de dez días hábiles, conforme á Lei de Transparencia, acceso á información pública e bo goberno. Ademais, establece un prazo de 15 días para que o organismo remita á propia Comisión unha copia da resolución notificada á plataforma. A reclamación afectaba a tres peticións presentadas o 15 de abril, o 27 de maio e o 27 de novembro de 2025.
A voceira de Ulloa Viva, Marta Gontá, cualificou a decisión como un "tirón de orellas" á Xunta e a Augas de Galicia, ao considerar que recoñece o dereito da cidadanía a acceder á información pública. A plataforma lembra que, tras solicitar a documentación en abril de 2025, non recibiu unha petición para concretar a que partes do expediente quería acceder ata o pasado 23 de outubro, ano e medio despois. Para o colectivo, este requirimento supón unha nova traba, xa que reclama consultar a documentación completa.
Reclaman transparencia ao novo conselleiro
Tras a resolución, Ulloa Viva agarda que Augas de Galicia facilite por fin o acceso ao expediente e reclama un cambio de actitude na Consellería de Medio Ambiente tras a substitución de Ánxeles Vázquez por Nicolás Vázquez. A plataforma pide ao novo conselleiro "transparencia e empatía" e confía en que cumpra a resolución do órgano autonómico.
Gontá considera que o responsable de Medio Ambiente debe ordenar que se execute o acordo e permitir que a veciñanza consulte toda a documentación que Augas de Galicia tramita sobre o proxecto de Altri. A entidade asegura que non entendería outra resposta que non fose o cumprimento da legalidade e das indicacións da propia Comisión da Transparencia.
A plataforma advirte tamén de que está a atopar dificultades semellantes noutras peticións de información presentadas ante a Xunta sobre a tramitación do proxecto Gama. Segundo denuncia, leva meses sen poder acceder á documentación completa e considera que a cidadanía ten dereito a coñecer todos os pasos administrativos dados polo Goberno galego.
Ulloa Viva asegura que continuará reclamando toda a información dispoñible e insiste na súa oposición ao proxecto industrial de Altri, que pide que sexa finalmente denegado e descartado.