Tres corais interpretan no Mercado Quiroga Ballesteros a versión orixinal do Himno Galego
As corais Solo Voces, Cántigas e Frores e Lucus Terra xuntáronse esta tarde no Mercado Quiroga Ballesteros de Lugo para ofrecer unha interpretación conxunta da versión orixinal do Himno Galego nun acto que serviu para lembrar o 118 aniversario da súa estrea, que tivo lugar o 20 de decembro no Gran Teatro da Habana.
A iniciativa desenvolveuse neste espazo emblemático da cidade coa colaboración da Vicepresidencia da Deputación de Lugo e contou cun marcado carácter simbólico e reivindicativo arredor dun dos principais símbolos de Galicia.
A actividade, promovida polas entidades Vía Galega e Galiza Cultura, tivo como obxectivo contribuír á difusión e á popularización do texto orixinal do Himno Galego, composto por Eduardo Pondal, facendo fincapé na necesidade de corrixir as modificacións e imprecisións textuais que, segundo os organizadores, foron incorporadas á Lei de Símbolos de Galicia.
A interpretación conxunta das tres formacións corais converteuse así nunha chamada á recuperación fiel da letra histórica e ao respecto pola versión creada polo seu autor.