Tres xadrecistas lucenses compiten en Croacia como únicos representantes españois nun torneo internacional
A Escola Luguesa de Xadrez está presente en Croacia coa participación de tres dos seus xogadores no V Open Internacional Arsenal Hvar 2026. Adán Carballido Bouzas, Pedro Fernández López e Diego Vázquez Álvarez son os únicos representantes españois nesta competición, que se celebra na illa de Hvar entre o 19 e o 25 de outubro.
O torneo ten como escenario o emblemático Arsenal Hvar e reúne participantes de diferentes nacionalidades, entre eles Grandes Mestres e Mestres Internacionais. A competición desenvólvese ao longo de nove roldas, cun ritmo de xogo de 90 minutos por xogador máis 30 segundos adicionais por cada movemento.
A presenza dos tres integrantes da escola lucense supón unha oportunidade para medirse a xogadores de distintos niveis e procedencias, adquirir experiencia competitiva e seguir progresando neste deporte.
A Escola Luguesa de Xadrez destaca así a participación dos seus representantes nunha cita internacional que permite levar o nome de Lugo máis alá das fronteiras galegas e españolas.