UNED Lugo e Coidemos Lugo retiran máis de 400 quilos de lixo nun tramo de medio quilómetro do Miño
Máis de 400 quilos de residuos foron retirados este domingo nun tramo de apenas medio quilómetro do río Miño situado nas proximidades da sede da UNED de Lugo, durante a participación de persoas voluntarias desta entidade e de Coidemos Lugo na XIX Limpeza Simultánea "Móllate polos Ríos".
A actividade desenvolveuse entre as 11:00 e as 13:00 horas, período no que as persoas participantes percorreron as marxes e o contorno fluvial para retirar os residuos acumulados na zona.
Entre o lixo recollido destacou especialmente a elevada presenza de toalliñas hixiénicas, xunto con plásticos, envases, latas e outros materiais de diversa natureza. En total, a cantidade retirada superou os 400 quilos nun espazo duns 500 metros.
A xornada permitiu comprobar a presenza de residuos nun contorno fluvial próximo a zonas urbanas e serviu tamén para poñer o foco nos efectos que determinados hábitos cotiáns poden ter sobre os ecosistemas fluviais.
Ademais da retirada de lixo, a iniciativa busca contribuír á sensibilización e á educación ambiental, facilitando que as persoas participantes coñezan directamente a situación das marxes dos ríos e o impacto que os residuos teñen sobre o medio natural.
A actividade integrouse na XIX Limpeza Simultánea "Móllate polos Ríos", promovida por ADEGA no marco do Proxecto Ríos e desenvolvida de maneira simultánea en distintos puntos de Galicia coa colaboración de asociacións, colectivos ambientais, concellos, centros educativos e outras entidades.
A participación da UNED de Lugo dá continuidade ás accións de sensibilización ambiental desenvolvidas pola entidade a través de iniciativas como #LugoNaturalMente e á colaboración con colectivos do territorio, como Coidemos Lugo, para promover actuacións relacionadas coa conservación do medio natural.