Unha nova candidatura formada por familias de ASPNAIS aspira liderar a Xunta Directiva
Un grupo de familias vinculadas a ASPNAIS presentou unha candidatura para concorrer ás eleccións á nova Xunta Directiva da asociación, que se celebrarán o próximo 19 de setembro. A proposta está integrada por dez persoas cunha longa relación coa entidade e co movemento asociativo e aposta por abrir unha nova etapa na que as familias recuperen peso na participación e na toma de decisións.
O proceso electoral terá un carácter histórico para ASPNAIS, xa que será a primeira vez desde a súa creación que a renovación da Xunta Directiva se realizará mediante unhas eleccións con diferentes candidaturas. En total, 173 familias de toda a provincia de Lugo están chamadas a participar na votación para escoller o órgano de goberno que estará á fronte da asociación durante os próximos catro anos.
A candidatura considera que este proceso representa unha oportunidade para recuperar o espírito asociativo que acompañou o nacemento e o desenvolvemento de ASPNAIS. Segundo explica o grupo, nos últimos anos o protagonismo das familias "foise diluíndo progresivamente", nun contexto condicionado tamén polo relevo xeracional e polo envellecemento de moitos dos pais e nais que estiveron detrás da creación e consolidación da entidade.
A proposta parte da defensa de que ASPNAIS pertence ás persoas asociadas e de que deben ser as familias, a través dos órganos democráticos da asociación, as que participen nas decisións e determinen as prioridades e o rumbo da entidade.
"Queremos que as familias recuperen o protagonismo que sempre tiveron en ASPNAIS. Presentámonos desde o compromiso coa asociación, coas familias e, sobre todo, coas persoas usuarias e cos seus dereitos", sinalan desde a candidatura.
Un equipo con décadas de experiencia
A lista está encabezada por Bernardino Pardo Teijeiro como candidato á Presidencia e Miguel López Crespo como candidato á Vicepresidencia. Araceli Pillado Salgado ocuparía a Secretaría; Pilar Maseda Teijeiro, a Vicesecretaría; Teresa López Sufuentes, a Tesouraría; mentres que María Avelina Rouco Ares, Ovidio Barreiro Varela, María del Carmen González Lagarón, José Manuel Corredoira Simón e Olga Gómez Maciñeiras concorren como vogais.
O equipo combina diferentes xeracións e traxectorias, con integrantes que coñecen a asociación desde dentro e que acumulan experiencia tanto en ASPNAIS como no movemento asociativo e na defensa dos dereitos das persoas con discapacidade.
Bernardino Pardo Teijeiro, candidato á Presidencia, é médico de familia e acumula 46 anos de servizo público no SERGAS e 35 anos de vinculación con ASPNAIS. Ademais, é fillo de Conchita Teijeiro Revilla, unha das fundadoras da entidade, polo que asegura coñecer de primeira man as orixes da asociación e o papel que tiveron as familias no seu desenvolvemento.
Pola súa banda, Miguel López Crespo, candidato á Vicepresidencia, conta cunha ampla experiencia no ámbito asociativo e exerce como secretario de FADEMGA Plena Inclusión Galicia, entidade que representa o movemento asociativo galego das persoas con discapacidade intelectual e das súas familias. É tamén fillo do pintor lucense López Guntín.
Na candidatura figura igualmente María del Carmen González Lagarón, Carmela, como candidata a vogal. A súa traxectoria inclúe máis de tres décadas vinculada aos órganos directivos de ASPNAIS e a participación na directiva de FADEMGA Plena Inclusión Galicia. O grupo presenta estas experiencias como unha mostra do coñecemento acumulado no seo da entidade e do compromiso coa defensa dos dereitos das persoas con discapacidade.
Segundo explican, a incorporación das dez persoas á candidatura produciuse "dunha maneira natural", a partir da súa vinculación coa asociación e do convencemento compartido de que é necesario reforzar a participación das familias.
Máis presenza das familias e unha planificación a longo prazo
Entre as principais propostas figura a creación dunha Xunta Directiva máis presente no día a día de ASPNAIS, cunha comunicación máis directa coas persoas asociadas e unha maior participación nos asuntos relevantes para o futuro da entidade.
A candidatura aposta tamén por reforzar a transparencia e recuperar unha planificación a medio e longo prazo que permita anticipar as necesidades das persoas usuarias e das súas familias e establecer as prioridades da asociación para os próximos anos.
O grupo defende que a profesionalización da xestión dos servizos debe ser compatible cunha Xunta Directiva forte, á que corresponda establecer prioridades, supervisar o funcionamento da entidade e representar os intereses das familias, mentres os equipos profesionais desenvolven a xestión dos diferentes servizos.
Reforzar o asociacionismo en Galicia
Outro dos eixes do proxecto pasa por fortalecer a presenza de ASPNAIS no movemento asociativo galego e a súa participación en FADEMGA Plena Inclusión Galicia. A candidatura reivindica o papel que historicamente desempeñaron as familias organizadas e as asociacións na consecución de avances nos dereitos e na atención ás persoas con discapacidade.
Neste sentido, aposta por reforzar a colaboración e a interlocución conxunta coa Xunta de Galicia, o Goberno e o resto das administracións para continuar reclamando os servizos, apoios e recursos necesarios para as persoas con discapacidade e as súas familias.
Ao mesmo tempo, a candidatura defende a continuidade e estabilidade dos servizos que presta ASPNAIS independentemente do resultado das eleccións. "O que as familias decidirán o 19 de setembro é quen as representará e que orientación queren para a asociación durante os próximos catro anos", sinalan.
Primeiras eleccións na historia de ASPNAIS
A xornada do 19 de setembro marcará un antes e un despois na historia da asociación. As 173 familias chamadas ás urnas poderán participar por primeira vez nun proceso electoral para decidir a composición da Xunta Directiva de ASPNAIS.
Para esta candidatura, a existencia de diferentes propostas supón unha oportunidade para reforzar a participación interna e o carácter asociativo da entidade.
"Cremos no proceso democrático. Que as familias poidan escoller entre diferentes propostas é positivo para ASPNAIS. A asociación é das familias e son elas as que teñen que decidir o seu futuro", conclúen.