Sociedade

Profesionais de distintos ámbitos analizan unha das formas máis invisibilizadas da violencia machista

Lugo acolleu a xornada 'A violencia económica exercida contra as mulleres: control económico, sabotaxe laboral e explotación económica”, un encontro centrado en visibilizar e analizar unha das manifestacións menos recoñecidas da violencia machista.

A cita reuniu profesionais dos servizos sociais, dos Centros de Información á Muller, das forzas e corpos de seguridade, así como representantes dos ámbitos xurídico, educativo e asociativo. Durante a apertura, a subdelegada do Goberno en Lugo, Olimpia López, agradeceu o labor diario destes colectivos, aos que definiu como pezas clave na primeira liña de atención e acompañamento ás vítimas.

Na súa intervención, López advertiu de que a violencia económica golpea directamente a autonomía das mulleres, a súa liberdade e a súa capacidade para tomar decisións. Tamén incidiu en que durante moito tempo esta realidade non recibiu a atención necesaria, a pesar do profundo impacto que ten na vida das afectadas.

Segundo explicou, esta forma de violencia maniféstase a través do control dos recursos económicos, a limitación do acceso ao emprego ou a apropiación dos bens da muller, xerando situacións de dependencia que dificultan a saída do círculo da violencia. Ademais, lembrou que adoita aparecer vinculada a outras agresións, especialmente de carácter psicolóxico e, en numerosos casos, tamén físico ou sexual.

No marco da xornada, a catedrática Coral del Río Otero ofreceu unha análise da violencia económica desde a perspectiva da desigualdade e do xénero. Pola súa banda, a delegada da Axencia Tributaria en Lugo, María Elena Rosendo Vázquez, expuxo os riscos existentes e as respostas institucionais no ámbito fiscal.

Durante o acto, a subdelegada lembrou o compromiso do Goberno de España coa loita contra a violencia machista e destacou a asignación de máis de 13,5 millóns de euros a Galicia para reforzar estas políticas. Desa contía, preto de 12,5 millóns destínanse ao desenvolvemento do Pacto de Estado contra a Violencia de Xénero.

Finalmente, Olimpia López apelou á necesidade de seguir avanzando na formación, na coordinación entre administracións e na sensibilización social para ofrecer unha resposta integral fronte a todas as formas de violencia exercida contra as mulleres, incluída a económica.