Xaquedrum organiza o Torneo Escolar de Nadal de Xadrez o vindeiro 14 de decembro
A Asociación Cultural Xaquedrum, a Escola Luguesa de Xadrez e a A Concellería de Educación organizan o Torneo Escolar de Nadal de Xadrez, que se celebrará o domingo 14 de decembro no soto da Praza de Abastos.
O torneo estrutúrase en varias categorías segundo o ano de nacemento: Prebenxamín (2019–2018), Benxamín (2017–2016) e Infantil (2015–2014). A organización realizará a comprobación de inscricións ás 16 horas, mentres que as partidas terán lugar entre as 16.30 horas e as 19 horas, cos emparellamentos xerados mediante o programa informático Swiss Perfect.
A iniciativa nace coa intención de promover a práctica do xadrez entre a mocidade e facilitar a conciliación da vida laboral e familiar. A zona de competición estará reservada exclusivamente aos participantes, co obxectivo de garantir o bo desenvolvemento das partidas.
A participación é totalmente gratuíta e todos os xogadores deberán estar federados nalgún equipo. Para quen non o estea, o club tramitará a federación sen custo enviando o DNI ao correo xaquedrum@gmail.com.
As inscricións permanecerán abertas ata o 13 de decembro ás 16 horas, lembrando que aqueles que non se anoten dentro do prazo poderían quedar fóra da convocatoria. O límite é de 120 prazas, que se cubrirán por estrita orde de solicitude.