Xerardo Quintiá e Baldo Ramos presentan en Friol o poemario 'Umbilical'
Xerardo Quintiá e Baldo Ramos darán a coñecer o sábado 18, ás 18.00 horas, na Torre de San Paio de Narla, no municipio de Friol, o seu novo libro 'Umbilical', un proxecto literario no que ambos autores traballaron durante os últimos cinco anos.
O volume preséntase como un poemario marcado tanto polas diferenzas creativas entre os seus autores á hora de abordar o feito poético como pola fonda ligazón que os une a unha terra común, entendida por ambos como parte esencial do seu percorrido vital. Esa dualidade, entre afastamento e encontro, define o espírito dunha obra que nace do contraste pero tamén da complicidade.
O acto contará coa condución de Montse Castro, profesora titular da Universidade da Coruña, e incluirá a participación da escritora, tradutora e poeta escénica Mónica Caldeiro, nada en Barcelona e actualmente afincada no O Corgo, quen tamén reflexionou sobre o territorio como espazo habitable a través da palabra.
Os autores quixeron expresar o seu agradecemento á asociación Carballo Vivo pola organización do evento e polo seu labor continuado na promoción da cultura en lingua galega, así como á Rede Museística Provincial de Lugo por facilitar o uso da Torre de San Paio de Narla para a celebración desta presentación literaria.