Yago Iglesias comprométese co CD Lugo cun proxecto ambicioso e cheo de ilusión
Yago Iglesias foi presentado como novo adestrador do primeiro equipo do Club Deportivo Lugo nunha conferencia de prensa na que estivo acompañado polo director deportivo, Javi Recio, e o director xeral, Adrián Raguza.
O técnico amosouse especialmente ilusionado coa oportunidade e asegurou que o que lle transmitiu o club foi clave para tomar a decisión: “Síntome querido, creo que os directivos queren que estea aquí e por iso comprometinme. Temos ilusión, tanto eu coma o club, e iso é fundamental”.
Iglesias afirmou que está ante unha oportunidade para seguir medrando no mundo do fútbol, subliñando que aínda é novo e ten moitas ganas de chegar ao fútbol profesional. “Creo que nos atopamos nun bo momento, e tamén a afección xera esa ilusión. Eu busco proxectos ambiciosos, que aspiren a máis. A presión enténdoa doutra maneira: isto vai de gañar e de ter bos resultados. Non sinto presión, senón ilusión e ganas”.
O novo adestrador puxo énfase na importancia de contar cos mellores xogadores posibles dentro das posibilidades do club, pero tamén destacou que o fundamental é que sexan futbolistas con calidade, ambición e ilusión. “Cada ano que pasa sei mellor por onde empezar e o que quero transmitir. Este é un proxecto para pelexar por todo, e sabemos que o camiño é longo, polo que hai que comezar desde o primeiro día de pretempada coa máxima entrega”.
"Ilusión, traballo e humildade; é o que Yago Iglesias pode transmitir ao Club Deportivo Lugo, e hai que gañar, pero eu son un romántico de como se gaña", concluíu o adestrador.