A ampliación do Pazo dos Deportes de Lugo centrarase nunha reunión entre administracións en setembro
A ampliación do Pazo dos Deportes de Lugo dará un novo paso o próximo 3 de setembro coa celebración dunha reunión na que se abordarán as posibilidades de financiamento e desenvolvemento do proxecto. A proposta contempla aumentar a capacidade do recinto mediante a creación dunha nova estrutura perimetral exterior á altura da terceira planta, o que permitiría habilitar novos corredores de distribución e destinar os espazos actuais á instalación de gradas fixas.
Segundo o estudo técnico presentado nos últimos meses, esta actuación permitiría incorporar arredor de 1.000 novas localidades, respondendo á demanda existente e mellorando as condicións dun recinto que acolle habitualmente competicións deportivas e outros eventos multitudinarios.
Paralelamente, esta semana comezaron os traballos de reforma do palco do pavillón, unha actuación valorada en 47.000 euros que permitirá gañar 116 novos asentos para público xeral. As obras consisten na retirada de parte da estrutura instalada sobre a grada para ampliar a zona de autoridades e na posterior reorganización do espazo, co obxectivo de incrementar o número de localidades dispoñibles de cara ao inicio da nova tempada.
Estas actuacións forman parte do proceso de modernización que vén experimentando o Pazo dos Deportes nos últimos anos. Entre as melloras realizadas figuran a renovación dos asentos do anel inferior, a substitución da iluminación, actuacións de accesibilidade, a mellora da pista deportiva, a limpeza da fachada, a instalación de novas varandas, a impermeabilización da cuberta e a colocación dun videomarcador.
Ademais, no pavillón anexo acometéronse intervencións como a renovación do parqué e a construción de novos vestiarios, actuacións que supuxeron un investimento conxunto próximo aos 2 millóns de euros.
A convocatoria da reunión foi realizada pola Vicepresidencia da Deputación de Lugo, que invitou ao Concello de Lugo, á Xunta de Galicia e ao Consello Superior de Deportes a analizar o estudo técnico e valorar a súa participación no financiamento da futura ampliación. O vicepresidente provincial, Efrén Castro, explicou que o encontro busca coñecer a disposición das distintas administracións para colaborar economicamente nun proxecto que considera estratéxico para o deporte lucense.