A apertura do acceso á A-54 desde Remonde mellora a conexión de tres parroquias de Palas de Rei
As parroquias de Remonde, Pambre e Orosa dispoñen desde a pasada semana dun acceso directo á autovía A-54, unha mellora que facilita os desprazamentos da veciñanza cara a Melide, Lugo e Palas de Rei. O BNG de Palas de Rei celebrou a apertura completa desta conexión, que considera unha demanda histórica da poboación da zona.
A formación nacionalista asegura que leva anos reclamando esta actuación, unha petición que tamén trasladou ao Congreso a través do deputado Néstor Rego, quen solicitou ao Goberno central unha solución para garantir a accesibilidade destas parroquias.
Segundo o BNG, a nova conexión permitirá reducir os rodeos e aforrar tempo e quilómetros nas viaxes, ademais de mellorar a mobilidade nunha zona rural. A organización defende que as infraestruturas viarias deben responder ás necesidades da poboación e contribuír á calidade de vida, á actividade económica e ao mantemento da poboación no territorio.
"Esta é unha boa noticia para a veciñanza e unha demostración de que a constancia, a mobilización e o traballo político dan resultados", sinalan desde a formación, que atribúe a consecución desta mellora ás reivindicacións mantidas durante anos.
Dúas actuacións pendentes
Malia celebrar a apertura, o BNG advirte de que aínda quedan problemas relacionados coas obras da autovía que precisan solución. Representantes locais da formación visitaron a zona hai dez días, antes da entrada en funcionamento do acceso, e identificaron dúas cuestións que consideran prioritarias.
Por unha banda, reclaman restablecer o abastecemento de auga ao pozo comunal de Remonde, que, segundo denuncian, secou como consecuencia dos traballos da A-54. Por outra, piden reparar con urxencia a estrada que une Remonde co Coto, cuxo estado de deterioración consideran que require unha intervención das administracións competentes, especialmente do Concello e da Deputación de Lugo.
"Celebramos o conseguido, pero non damos por rematadas as reivindicacións da veciñanza. Non é aceptable que unha obra pública deixe un lugar sen auga no seu pozo comunal nin que se manteña unha estrada en malas condicións sen ofrecer solucións", advirten.
O BNG de Palas de Rei pon tamén en valor a coordinación entre a organización local e a súa representación nas Cortes do Estado, especialmente a través de Néstor Rego, para trasladar as demandas da veciñanza ás institucións. A formación considera que a apertura do acceso á autovía supón un avance para as parroquias afectadas, aínda que insiste na necesidade de resolver os problemas que, segundo sostén, seguen pendentes.