A Biblioteca Isidro Novo programa seis actividades infantís e un club de lectura para este outono
A Biblioteca Municipal Isidro Novo, situada no parque da Milagrosa, en Frigsa, desenvolverá entre outubro e decembro unha programación de animación á lectura con seis propostas infantís e un club de lectura para persoas adultas. A iniciativa combina contacontos, teatro, xogos e monicreques para achegar os libros á veciñanza e fomentar o hábito lector desde a infancia.
O concelleiro de Cultura, Javier Vázquez, visitou as instalacións para presentar as actividades previstas e os datos de funcionamento deste equipamento municipal.
A programación infantil comezou o xoves 22 de outubro co escape room "Os misterios da biblioteca", a cargo de Ludus Tempori. As cinco propostas restantes celebraranse no Museo Interactivo da Historia de Lugo (MIHL).
O calendario continuará o xoves 29 de outubro con "Contos de medo que deixan durmir", de Caxoto, un espectáculo de narración oral para nenos e nenas a partir de catro anos. A proposta recupera personaxes da tradición popular galega, como a Santa Compaña, os Sacaventos e o home lobo, combinando misterio e humor.
En novembro, o día 5, Raquel Queizás presentará "Raposadas", unha sesión de contacontos para público a partir de tres anos protagonizada por unha raposa curiosa e aventureira que descubrirá novas historias, cancións e adiviñas.
O 19 de novembro chegará "Nube de algodón", de Trémola Teatro, unha proposta dirixida a nenos e nenas de entre un e tres anos. A través da historia dunha nube que cambia de cor segundo as emocións que experimenta, os máis pequenos poderán achegarse ao recoñecemento e á expresión dos sentimentos.
O xoves 26 de novembro, Teatro Ghazafelhos representará "A máquina do tempo", un espectáculo para público a partir de catro anos no que os protagonistas viaxarán por diferentes épocas históricas grazas a unha peculiar máquina.
A programación rematará o 10 de decembro con "Un Nadal cheo de contos", de Tarabelos. Esta sesión de monicreques e narración oral, dirixida a nenos e nenas a partir de tres anos, reunirá historias do Nadal procedentes de diferentes lugares do mundo.
Todas as actividades comezarán ás 18.00 horas e serán gratuítas. Para asistir será necesario retirar previamente unha entrada na plataforma entradaslugo.es, dispoñible desde o luns da semana na que se celebre cada actuación. As persoas adultas acompañantes tamén deberán contar con entrada. Para favorecer a participación infantil, permitirase un único acompañante adulto por unidade familiar e un máximo de tres entradas por persoa.
A oferta complétase co club de lectura coordinado pola escritora lucense Antía Yáñez, que iniciou a súa actividade esta semana. O grupo dispón de 24 prazas e xa conta cunha lista de espera, unha resposta que amosa o interese por este espazo para compartir impresións e experiencias arredor dos libros.
A biblioteca suma actualmente 15.285 persoas inscritas, das que 12.842 son adultas e 2.443 pertencen ao público infantil. Desde o comezo de 2026 incorporou 314 novas persoas usuarias e rexistrou 16.907 préstamos, dos que 2.741 se realizaron desde principios de setembro.
O fondo documental ascende a 46.265 unidades, entre libros, documentos audiovisuais e documentos sonoros. A colección inclúe 40.185 libros, dos que 21.956 están na sala de adultos e 18.229 na infantil. Ao longo deste ano incorporáronse 629 novos exemplares para actualizar os fondos e responder aos intereses lectores de persoas de diferentes idades.